Actividades en liña

Cultura

O uso do galego para todo

O uso do galego para todo
Unha língua non pode perpetuar-se se non se exercita, unha língua non pode realizar-se se non se proxecta sobre un mundo real. Hoxe todos, ao parecer, concordamos nisto, mesmo aqueles que, non hai moito ainda, semellaban transixir co galego só como língua literária, cando non só como língua lírica. Teríamos asi –nese suposto restritivo– unha língua ritual, reservada, confinada, refreada, conxelada, e, polo tanto, esmorecida, reprimida, asfixiada, acadarmada. E consecuentemente, unha língua ferida de morte. Unha língua morta, un latin para especialistas, pronto inintelixíbel para o comun dos galegos. Se queremos de verdade que o galego viva, temos que facé-lo viver todas as vivéncias da sociedade actual. Non só as vivéncias estéticas, conforme a unha doble tradición, a tradición da nosa literatura moderna, encetada polos ilustrados e prerrománticos do século XVIII, e a tradición medieval, totalmente, ou cuase totalmente ignorada polos dezaoitistas, senón tamén as vivéncias do uso coloquial, do uso comercial, do uso notarial, do uso administrativo, do uso relixioso e do uso político. A língua galega ten que ser a língua normal dos galegos.
Ricardo Carvalho Calero, Umha voz na Galiza (publicado orixinalmente en La Voz de Galicia no ano 1981)

Cultura en liña: Aranjuez
Fragmento do adagio do Concierto de Aranjuez para guitarra e orquestra de Joaquín Rodrigo.
Intérprete: Javier Merchán Sánchez-Jara

Cultura en liña: A danza: unha imaxe en movemento
A danza é liberdade, e a través dela poderemos chegar a todos os rincóns do mundo, e por iso é tan importante (nestes momentos tan complexos para todas e todos) buscar maneiras de liberación e desconexión. Para todo isto a Compañía Nacional de Danza xunto co Ballet Nacional de España lanzaron un challenge para que, aínda que sexa desde a casa, deixemos fluír o noso corpo ao son da música do Bolero de Ravel, interpretada por Carlos Nuñez.
Levar a cabo esta coreografía é unha maneira de, a través da danza, poder converter un día gris nun claro de luz ao final deste longo camiño que estamos a percorrer todas e todos xuntos.
Intérprete: Rebeca Castro Doval

Cultura en liña: "El Cancionero de Carmen", pertencente ao "Proxecto Frederick"
Frederick é un ratiño protagonista dun famoso álbume ilustrado de Leo Lionni que garda palabras, versos e historias no verán para os malos tempos do inverno. O proxecto Frederick consta de dúas partes e quere achegar aos nenos e nenas confinados a literatura de tradición oral. Na primeira parte da proposta, o estudantado tiña de facer unha gravación contando un conto, subilo a unha conta de YouTube habilitada para tal fin e compartila en redes sociais. Na segunda parte, os e as estudantes recolleron textos do cancioneiro tradicional infantil dos seus familiares (con especial atención ás personas maiores) e están a facer diferentes creacións audiovisuais para transmitirlles estes textos (cancións de xogo, ratafías, cancións de sorteo, adiviñas, nanas) aos nenos e nenas confinados.
Autora: Iria Sieiro, da materia Lingua e Literatura Castelá e a súa Didáctica (Facultade de Ciencias da Educación), impartida por Patricia Carballal.

Cultura en liña: Bailando co mar - Arredores
A canción está composta completamente por nós coa morriña que nos transmite o mar, o seu olor e o seu son. Foi gravada integramente por cada un desde a súa casa neste confinamento. Tocala nestes momentos transmítenos a liberdade (a pesar de atopármonos xa moito tempo recluídos). A liberdade de estar xunto ao mar, a liberdade de respirar o salitre, a liberdade de sentirnos ceibes. O tema fala dunha bailadora que expresa unha forma de deixarse levar. Bailar como vía de relaxación ou como forma de desconexión. Así nace esta canción, como forma de desafogue para nós. De expresar os nosos sentimentos e deixarnos levar (sobre todo, nestes intres tan duros para todos). A letra é de execución propia con influencia das coplas populares tradicionais galegas (ao seren descoñecida a súa orixe e o seu autor son coplas anónimas). Aínda que algunha das coplas teñen influencia do lugar de Cerqueda, Malpica de Bergantiños.
Intérpretes: Icía Varela Gómez, Andrés Rodríguez Boutureira e Brian Rodríguez Pardiñas.

Cultura en liña: As mulleres nas artes e nas ciencias

Cultura en liña: As mulleres nas artes e nas ciencias
Nesta exposición realízase un percorrido pola historia, dende a Antigüidade ata os nosos días, para dar a coñecer a vida e as achegas dalgunhas mulleres que sobresaíron no campo das artes e das ciencias como protagonistas, pioneiras, valentes e capaces. Unha mostra representativa que visibiliza a indubidable riqueza que proporcionaron ao mundo do coñecemento, dende ámbitos, como a matemática, astronomía, dereito, socioloxía, pintura, literatura, música, economía, escultura, bioloxía, arquitectura,... 
Tamén pretende ofrecer modelos que nos leven a aproximarnos á ciencia con orgullo, dignidade e seguridade; esperte o sentido crítico, desmonte as ideas e os prexuízos, transmita a cultura da igualdade, rescate a memoria e sexa referencia de consulta e orientación para xerar respostas propias.
Autoras/esRocío Chao Fernández, Dorinda Mato Vázquez, Roberto Suárez Brandariz e José María Mesías Lema.

Cultura en liña: Feliz Día do Libro
A Biblioteca da Facultade de Economía e Empresa lémbranos a importancia da lectura nesta etapa de confinamento.

Cultura en liña: un poema para o Día do Libro
Lucía Cernadas ofrécenos un dos seus poemas para celebrar o(s) día(s) do libro.
Cultura en liña: O son da nosa aula interpretando "O son do ar" de Bieito Romero
Proxecto didáctico organizado e deseñado unha vez iniciado o confinamento, desde a materia Proxectos de Innovación e Investigación Educativa en Música, impartida por Rocío e Aurelio Chao, sendo o encargado da orquestración o tamén profesor da nosa Área, Francisco César Rosa Napal. Colaboraron voluntariamente estudantes do Máster de Secundaria do itinerario de Música, do Máster Universitario en Investigación e Innovación en Didácticas Específicas para Educación Infantil e Primaria, de Grao, e alumnado de doutoramento vencellado á Aula de Música, un dos cales, Abraham Felpeto Guerrero, encargouse da montaxe de audio e produción de vídeo. Cómpre salientar tamén a inestimable colaboración do autor da obra, Bieito Romero.

Deportes

Actividades en liña: Condición física xeral
Nivel: medio. Duración: 56 min 17 seg
Derradeira sesión desta serie de vídeos de actividade física, na que, desde a Área de Deportes da Vicerreitoría de Igualdade, Cultura e Deportes tratamos de acadar que, as persoas que os practicasen, levasen un confinamento o máis saudable posible. Moitas grazas polo seu seguimento. Esta última sesión ten como obxectivo traballar e mellorar a condición física desde unha perspectiva funcional e de saúde facéndoo de maneira global con exercicios que requiren un mínimo control na súa execución e un mínimo de forza. Material necesario: unha botella de auga (pequena) e unha toalla.

Actividades en liña: sesión de forza para corredores e camiñantes
Nivel: medio. Duración: 1 h
Serie de exercicios encamiñados a traballar e mellorar a forza dende unha perspectiva funcional e de saúde. Especialmente dirixida para aquelas persoas que saian a camiñar e a correr nestes días e queiran completar a rutina de adestramento semanal. Material necesario: unha botella de auga (a de garrafón de 5 l, pero non é necesario que estea chea), unha caixa (que soporte o teu peso) e unha toalla.

Actividade física en liña: tonificación
Nivel: medio. Duración: 21 min 06 seg
Sesión de traballo de forza tanto de tren superior (bíceps, dorsal ancho, tríceps, deltoides...) como de tren inferior (glúteo, adutor, cuadríceps...) desta forma realizaremos un traballo de forma integral para os diversos grupos musculares nunha mesma sesión, de forma implícita, realízase tamén un traballo de equilibrio. Material necesario: toalla, roupa de deporte, 2 botellas de auga, dous trapos e unha esterilla.

Actividade física en liña: compensación da postura sentada (énfase en glúteo)
Nivel: medio. Duración: 28 min 52 seg
Serie de exercicios concentrados especialmente no traballo de tren inferior, zona glútea concretamente, escollidos para compensar os acurtamentos e debilidades musculares propios de pasar un tempo excesivo sentadas/os. Material necesario: un par de medias (que substitúan a goma elástica), unha caixa/elemento ríxido que nos manteña nunha pequena altura e un pano (de limpar o po, por exemplo).

Actividade física en liña: rutina cardiovascular
Nivel: inicio-medio. Duración: 18 min 39 seg
Sesión de traballo cardiovascular mediante unha pequena coreografía, con pasos moi sinxelos. Material necesario: toalla, roupa de deporte e botella de auga.

Actividade física en liña: sesión de forza
Nivel: medio. Duración: 24 min 42 seg
Serie de exercicios encamiñados a traballar e mellorar a forza desde unha perspectiva funcional e de saúde. Enfócase o traballo a todo o corpo e recoméndase realizar previamente un quecemento activo, así como, tras a sesión, un tempo de estiramentos. Material necesario: Unha botella de auga de 5 litros (non é necesario que estea chea), unha cadeira, unha caixa de zapatos e unha toalla.

Actividade física en liña: postura, estiramentos e benestar abdominal
Nivel: iniciación. Duración: 27 min 03 seg
Sesión que ten como obxectivo mellorar a nosa elongación na postura do corpo, recordar algunhas pautas dunha correcta postura sentada e activar a nosa faixa abdominal. Estiramentos, mobilizacións articulares, activación da musculatura do abdome e coordinación de todo isto coa respiración. Material necesario: unha cadeira e unha manta pequena ou coxín.

Actividade física en liña: traballo tonificación
Nivel: iniciación-medio. Duración: 25 min 00 seg
Sesión composta por 3 series de 8 exercicios de core, glúteo e perna, principalmente. Realización dun traballo que intenta compesar todas esas horas de teletraballo. Extensión dorsal, para conseguir unha postura menos cifótica potenciando o traballo das cadeas musculares posteriores. Material necesario: toalla, caixa, coxín (opcional), esterilla, roupa de deporte e botella de auga.

Actividade física en liña: compensación da postura sentada
Nivel: iniciación. Duración: 32 min 18 seg
Serie de exercicios tanto de tren superior como tren inferior, escollidos para compensar os acurtamentos e debilidades musculares propios de pasar un tempo excesivo sentadas/os. Material necesario: Unha cadeira, unha toalla, unha manta e un par de medias (que substitúan a goma elástica).

Actividade física en liña: traballo cardiovascular con método uniforme
Nivel: iniciación. Duración: 18 min 00 seg
Traballo cardiovascular mediante método continuo uniforme. Se desexamos maior dificultade e intensidade aumentaríase a velocidade, pódense realizar tres series. Material necesario: toalla, roupa de deporte e botella de auga.

Actividade física en liña: traballo de forza para membro superior
Nivel: iniciación. Duración: 36 min 44 seg
Serie de exercicios encamiñados a traballar e mellorar a forza desde unha perspectiva funcional e de saúde. Enfócase o traballo no tren superior do corpo e máis especialmente no brazos e cintura escapular onde se fai énfase, de xeito especial, para axudar a compensar as posturas que o teletraballo ou a estancia nas casas pode potenciar. Material necesario: dúas botellas de auga de igual tamaño, un par de medias (ou calcetíns ou material elástico en sustitución da goma elástica) e unha cadeira.

Actividade física en liña: benestar ombros, pescozo e zona superior das costas
Nivel: iniciación. Duración: 23 min 25 seg
Serie de exercicios para axudar a mellorar a mobilidade do ombro, estabilización e fortalecemento da cintura escapular así como permitir a apertura do noso peito co estiramento do pectoral o cal se ve acurtado xeralmente por mor de posturas cifóticas comúns do traballo de oficina etc. Material necesario: unha manta, un par de medias (en substitución da Thera Band ou banda elástica), unha botella pequena de auga e un pau da vasoira. 

Actividade física en liña: circuíto de tonificación
Nivel: iniciación. Duración: 26 min 17 seg
Circuíto de tonificación. Composto por dous bloques de dúas series cada bloque. Cada bloque consta de 5 exercicios, onde traballaremos diferentes grupos musculares como trapecio, deltoides, dorsal ancho, glúteo, psoas, core e outros músculos sinerxistas e estabilizadores. Material necesario: cadeira, botella de auga, toalla e esterilla.

Actividade física en liña: estiramentos
Nivel: iniciación. Duración: 35 min 03 seg
Serie de exercicios para poder realizar unha rutina de estiramentos tras unha sesión de adestramento, ou ben realizar de maneira íntegra a sesión completa. Material necesario: Unha cadeira, unha toalla e unha caixa.

Actividade física en liña: traballo cardiovascular
Nivel: intensidade media. Duración: 26 min 26 seg
Na sesión realízase traballo cardiovascular mediante un circuito formado por dous bloques. Cada bloque consta de 8 exercicios, dos cales se farán duas series. Cada exercicio dura 45 seg sendo 30 seg de traballo e 15 seg de descanso activo. Entre cada serie farase un descanso de 1,5-2 minutos de duración. Material necesario: toalla, roupa de deporte e botella de auga.

Actividade física en liña: respiración
Nivel: iniciación. Duración: 33 min 30 seg
O seguinte vídeo ten como finalidade realizar exercicios de respiración axudando a osixenación do organismo, dos músculos e tecidos, e brindar enerxía para o movemento. Material necesario: toalla pequena e unha cadeira

Actividade física en liña: traballo en cadeira
Nivel: iniciación. Duración: 34 min 38 seg
Serie de exercicios pensados para aquelas persoas que están moito tempo sentadas, e aproveitando a cadeira, realizar actividade física suave e de fácil execución. Material necesario: unha cadeira.

Actividade física en liña: 2.º circuíto de condición física
Nivel: intensidade media. Duración: 32 min 51 seg
Circuíto de condición física de intensidade media que consta de: quecemento, 6 exercicios, 10/15 repeticións por exercicio, 4 series (voltas ao circuíto), estiramentos. Material necesario: toalla pequena, 2 botellíns de auga e 1 pau de vasoira.

Actividade física en liña: aperturas
Nivel: iniciación. Duración: 16 min 55 seg
Cos exercicios que se presentan neste vídeo preténdense dar unhas sinxelas ideas de posturas de apertura, para potenciar a mobilidade e amplitude dos teus ombreiros, estiramento do teu pectoral e activación da túa cintura escapular e así evitar posicións cifóticas que nestes días poden aparecer de maneira máis recorrente. Material necesario: unha cadeira e unha toalla.

Actividade física en liña: rutina de cardio
Nivel: iniciación. Duración: 15 min
Sesión con exercicios continuos que favorecen a activación do sistema cardiovascular. Mestúranse movementos de zancadas e coordinación, entre outros, co paso de marcha ou trote lixeiro. Material: ningún

Actividade física en liña: amplitude de movemento
Nivel: intermedio. Duración: 14 min 50 seg 
Esta proposta ten como finalidade mellorar a amplitude de movementos. Está pensada para persoas que queren manterse activas ou para facer unha sesión de recuperación no caso de realizar previamente un adestramento de alta intensidade. Material necesario: ningún

Actividade física en liña: mobilidade dos pés
Nivel: iniciación. Duración: 21 min 35 seg 
Esta sesión ten como obxectivo mellorar a mobilidade dos pés, aos que normalmente non se presta moita atención pero que son a base da postura bípeda e sobre os que recae o peso de todo o corpo. Material necesario: toalla, lapis e pinza de tender a roupa.

Actividade física en liña: amplitude de movemento
Nivel: iniciación. Duración: 31 min 52 seg
Esta sesión está dirixida a todo o público que desexa moverse de maneira global e integral, traballando, principalmente, a amplitude de movemento de xeito sinxelo. Material necesario: cadeira e caixa (de zapatos por exemplo).

Actividade física en liña: traballo en circuíto
Nivel: iniciación. Duración: 31 min 09 seg
Adestramento en circuíto dirixido para aquelas persoas que non realizan actividade física habitualmente ou levan un tempo de inactividade. Consta de quecemento, parte principal, 6 exercicios, 10/15 repeticións por exercicio, 4 series (voltas ao circuíto) e estiramentos. Material necesario: 1 toalla pequena, 1 cadeira e 2 botellos de auga.

Actividade física en liña: mobilidade xeral
Nivel: iniciación. Duración: 28 min 03 seg
Esta sesión ten como finalidade a mobilidade xeral de todo o corpo, centrándose no tronco a través de propostas sinxelas. Material necesario: cadeira e toalla pequena.

Oficina de Cooperación e Voluntariado

VIVIR
Cover colaborativa da OCV da canción de Rozalén e Estopa