O consello de departamento de Letras está integrado pola directora, o secretario, todas as persoas doutoras vinculadas por relación funcionarial, laboral ou bolseira á Universidade da Coruña e todo o profesorado e axudantes sen título de doutor/a e a tempo completo integrados no departamento. Contan con representantes no consello de departamento, o profesorado a tempo parcial e o persoal investigador en formación que colabore na docencia, e o profesorado lector; o estudantado do ámbito da docencia do departamento, e o persoal de administración e servizos adscrito ao departamento.

O consello ten as seguintes funcións:

1. Elixir o director ou directora e, de ser o caso, revogalo/a.
2. Programar as actividades docentes e investigadoras do departamento, elaborar o seu plan de organización docente e propoñer os programas de doutoramento, de acordo coa Escola Internacional de Doutoramento.
3. Formular as demandas do persoal docente e investigador.
4. Organizar cursos ou estudos de posgrao ou especialización dentro do seu ámbito de competencia.
5. Participar na selección e contratación do persoal docente e investigador.
6. Propoñer nomeamentos de doutores honoris causa.
7. Aprobar a distribución do orzamento anual do departamento e a súa execución.
8. Elaborar o regulamento de réxime interno do departamento.
9. Informar as solicitudes de realización de congresos e xornadas científicas.
10. Calquera outra competencia que lle sexa asignada polas disposicións legais vixentes e os Estatutos.