Programa de Democratización do Coñecemento: “Compartir experiencias e coñecemento”

 

A nosa Universidade ven contribuíndo ao desenvolvemento humano e social das persoas adultas en correspondencia co que elas, mediante a súa experiencia, traballo e esforzo, achegaron e achegan á nosa sociedade.

Por outra banda, as institucións públicas galegas, tal e como establecen a Constitución e o Estatuto de Autonomía de Galicia, teñen a obriga de poñer os medios para facer extensivo o coñecemento e o saber a toda a sociedade, tanto o coñecemento universal como o local; este último máis relacionado coa memoria histórica e social das nosas comarcas e concellos.

Para facer efectiva esta acción desde a UDC foi preciso establecer unha colaboración entre as administracións públicas e os concellos para desenvolver un Programa Específico de Formación Universitaria para Maiores de 50 anos no Entorno Rural, onde a Universidade sería a encargada de elaborar as intervencións educativas coa finalidade de alcanzar diferentes obxectivos. A continuación exponse os principais elementos deste programa.

 

Finalidade e obxectivos

A finalidade esencial do Programa é achegar ás persoas maiores das comarcas implicadas, unha realidade formativa: o Programa Universitario para Maiores da UDC -a Universidade Sénior-, que se ven impartindo nas cidades de Coruña e Ferrol dende hai máis dunha década.

Os obxectivos nos que se traducen esta finalidade son:

• Proporcionar unha formación adaptada aos seus intereses culturais e formativos.
• Mellorar a calidade de vida a través da formación e do coñecemento, contribuíndo á prevención da dependencia.
• Favorecer o desenvolvemento persoal e social, potenciando as relacións interpersoais e interxeneracionais.
• Facilitar unha formación que permita unha aprendizaxe autónoma e un maior aproveitamento das ofertas formativas, culturais e de ocio.
• Promover unha cidadanía activa, crítica e participativa entre as persoas maiores.

 

O obxectivo principal deste programa é favorecer a democratización do coñecemento; potenciando e difundido o coñecemento científico e artístico a toda a poboación maior de 50 anos das Comarcas colaboradoras no proxecto. Para elo utilizamos accións específicas que se concretan nos seguintes obxectivos:

• Revalorizar e profundar no valor do noso patrimonio artístico e cultural.
• Concienciar e ensinar a presenza da ciencia en xeral como algo cotiá e próximo nas nosas vidas.
• Recoñecer o valor das disciplinas artísticas nas nosas emocións e vivencias.
• Adaptar e coñecer as competencias sociosanitarias dos principios de envellecemento activo.
• Acadar unha mellora da calidade de vida, do benestar e da participación a través do exercicio intelectual que require este tipo de formación.