A UDC a nivel institucional, en colaboración coas institucións nacionais e locais que coordinan as accións humanitarias de axuda a persoas refuxiadas ten en marcha, entre outras, accións concretas de axudas a estudantes de Ucraína que se atopan nestes momentos na UDC, e unha liña de axudas para incorporar ás nosas aulas estudantes procedentes de zonas en conflito, tanto con fondos propios como a través de fondos da Comisión Europea. 

É preciso avaliar a situación e establecer as canles e os contactos necesarios para obter información con persoas e institucións presentes no territorio e priorizar o apoio coas ONGD e actores humanitarios fiables, que contan con profesionais formados especificamente para o dito traballo e con coñecementos fundamentais para actuar nestas situacións de conflito.  

Varias ONGD da comunidade galega xa están levando a cabo accións de axuda en diversos ámbitos (saúde, infancia, refuxio, acompañamento, alimentación…) nas fronteiras de Ucraína e nos seus países veciños:  

Guia para persoas desprazadas de Ucrania en España 

A situación que se vive en Ucrania xera unha lexítima preocupación na cidadanía; pero non podemos esquecer a moitas outras poboacións que en distintos lugares do mundo sofren situacións similares. É necesario esixir o compromiso político con todas elas; facelo é crucial para salvar vidas, garantir os seus dereitos e promover a resolución dos conflitos.

Comunicado conxunto da Xunta de Galicia, as ONGD galegas e o Fondo Galego de Cooperación 

Recomendacións da Axencia Española de Cooperación Internacional para o Desenvolvemento (AECID)

Recomendacións para colaborar nunha situación de emerxencia humanitaria:

• A boa vontade non é suficiente. Si queres apoiar, asegúrate de que optas pola opción máis axeitada.
• Ten en conta que, nunha situación de crise humanitaria, os problemas manteranse por moito tempo. A túa axuda non é urxente; será válida durante moito tempo, por iso non te precipites na túa decisión.
• Seguro que na túa cidade existe algunha asociación de Ucrania. Contacta con ela e coñece as súas necesidades.
• Antes de nada, por favor, infórmate sobre as posibilidades de apoio que se che ofrecen. No caso de querer colaborar cunha ONG de Desenvolvemento, consulta o traballo que realiza, a que poboación se dirixe, que canles de colaboración ofrece, etc. De novo, non te precipites na túa decisión, contrasta e elixe unha vez teñas distintas opcións.

Por que se prefiren as doazóns económicas? Porque son moito máis efectivas e coherentes cos nosos valores:

• Os bens doados en especie en Galicia poden non ser axeitados ás necesidades da poboación e á situación humanitaria e loxística no terreo, que pode variar rápidamente en situacións de crises e deben ser avaliadas constantemente polos equipos de resposta humanitaria no terreo.
• Os bens doados individualmente poden supoñer custos e dificultades administrativas loxísticas adicionais (necesidade de embalaxe, trámites nas alfándegas suplementarios, data caducidade en alimentos e medicamentos, etc. ) para as ONG e administracións públicas que os xestionan, resultando máis práctico e efectivo o uso de kits de resposta humanitarios estandarizados, no caso de que os produtos necesitados non estean dispoñibles localmente ou en países veciños.
• Nunha situación de conflito, todas as persoas e as comunidades posúen capacidades de resposta malia a súa vulnerabilidade. De feito, a poboación local é a que sempre ofrece unha resposta inmediata que é a que garante que moitas vidas sexan salvadas. Por iso, as ONG e a administración intentarán fortalecer eses medios e capacidades empregando a persoal local, comprando materiais sobre o terreo que activen a economía e emprego locais e negociando con empresas nacionais.
• O persoal dunha ONG que traballa nun conflito armado segue un proceso de selección rigoroso, baseado na experiencia e formación. Non só se require coñecemento técnico, senón entre outros, tamén do ámbito da cooperación e do contexto específico no que se produce a urxencia.
• En momentos de conflitos e crises humanitarias a adopción de nenos e nenas non é unha opción. É moi difícil determinar en que situación familiar se atopan, polo que os esforzos céntranse en atendelos no propio terreo e en reagrupalos/as coas súas familias.