Declaración responsable da autenticidade da imaxe entregada para a xestión da fotografía universitaria da UDC

A persoa que facilita a imaxe correspondente á fotografía universitaria da UDC declara baixo a súa responsabilidade que a fotografía constitúe un dato veraz e que se corresponde coa súa persoa como parte da comunidade universitaria da UDC; por tanto, é consciente das posibles responsabilidades legais que se poderían derivar da achega de datos ou fotografías falsas.

O obxectivo da fotografía universitaria da UDC é obter unha identificación visual, non confusa, da persoa propietaria do documento. Como elemento identificador, debe representar fielmente a imaxe da persoa solicitante, polo que poden ser rexeitadas as que fagan confusa a identificación, aínda que se trate de fotografías recentes. Debe cumprir unha serie de requisitos:

• É moi importante que se mostre claramente o ovado da cara.
• O fondo da fotografía deber ser liso e de cor branca. Debe ser tomada de fronte para que se aprecie perfectamente o rostro e os ombros, coa cabeza totalmente descuberta.
• Só se admitirán prendas que cubran a cabeza por motivos relixiosos ou médicos, sempre que se mostre o ovado da cara e as cellas, os ollos, o nariz, a boca e o queixo.
• Os ollos abertos miran o obxectivo da cámara e, no caso de usar gafas, deben ter os cristais brancos, sen reflexos, e mostrar claramente os ollos. Non se poden levar gafas con cristais escuros que impidan ou dificulten a identificación da persoa. Só por causas médicas se permiten gafas con cristais escuros a persoas con déficit de visión, sempre que as utilicen habitualmente e con carácter permanente.
• A fotografía debe ser de alta resolución e non pode presentar retoques de Photoshop, para ocultar determinados aspectos como lunares, cicatrices, engurras, calvicie, manchas, etc.
• A fotografía ten que ser recente, como máximo dous anos de antigüidade e sempre que non exista un cambio nos trazos da persoa solicitante que impida unha identificación clara e absoluta.

As fotografías seguintes non son válidas e, por tanto, non se admiten:

• con medidas ou formatos distintos dos que se indican,
• que non sexan a cor (p. ex. branco e negro),
• con algún tipo de marxes,
• se están borrosas, pixeladas ou distorsionadas,
• con calquera tipo de fondo que non sexa branco liso,
• fotos grupais, con animais, con obxectos, figuras ou mobles de fondo etc.
• con algún tipo de accesorios e/ou prendas que dificulten a identificación: gorras, gafas de sol, peiteados que cubran parte da cara etc.

Información en materia de protección de datos persoais en relación coa fotografía universitaria da UDC

En cumprimento do artigo 13 do Regulamento (UE) 2016/679, do Parlamento Europeo e do Consello, do 27 de abril, relativo á protección das persoas físicas no que respecta ao tratamento de datos persoais e á libre circulación destes datos (RXPD), e do artigo 11 da Lei orgánica 3/2018, do 5 de decembro, de protección de datos persoais e garantía dos dereitos dixitais (LOPD), informamos de que a imaxe facilitada será tratada baixo a responsabilidade da Universidade da Coruña (rúa Mestranza 9, 15001, A Coruña, teléfono +34 981 16 70 00, correo electrónico rpd@udc.gal).

A finalidade do tratamento deste dato persoal é a identificación da persoa usuaria nos Servizos UDC. Todas as persoas que entren en contacto con este dato coa citada finalidade cumprirán o deber de confidencialidade establecido no artigo 5 LOPD. A base de lexitimación do tratamento deste dato sitúase no consentimento da persoa interesada: Art. 6.1.a) RXPD. Estes datos trataranse durante o tempo necesario para cumprir coa citada finalidade, sen prexuízo da súa conservación en relación coa posible esixencia de responsabilidades legais.

A persoa titular dos datos terá dereito a solicitar ao responsable do tratamento o exercicio dos dereitos de acceso, rectificación, supresión, oposición ou limitación do tratamento, nos termos previstos na lexislación vixente; para a información sobre o seu exercicio pódese consultar a web de protección de datos.