Web of Science ResearcherID

ResearcherID é a iniciativa máis antiga de todas as que estamos a ver aquí. Foi creada en 2008 por Thomson Reuters, naquel tempo propietaria de Web of Science. Consiste nun identificador de autor asociado ao teu rexistro ou perfil dentro da base de datos.

 

kosinski_wos

 

Cando é importante xestionar e actualizar o ResearcherID?

Calquera persoa con acceso a WoS pode crearse un perfil de autor e obter un ResearcherID, aínda que non teña publicacións indexadas nesta plataforma. Pero hoxe en día isto non ten moito sentido, xa que para iso está ORCID, que ten un carácter moito máis universal.

A principal utilidade de ResearcherID é que constitúe a única vía para garantir unha identificación unívoca dentro da plataforma Web of Science. Isto permite incrementar a túa visibilidade, evita a dispersión da produción científica en múltiples rexistros xerados automaticamente e asegura que os teus datos bibliométricos (como citas ou índice h) estean correctamente recollidos.

 

Que tipo de rexistros/perfís de autoría hai en WoS?

Na plataforma WoS podes atopar dous tipos de rexistros ou perfís de autor:

  • Rexistros algorítmicos. Coa túa primeira publicación indexada na plataforma, WoS xerará automaticamente un rexistro de autor provisional ou algorítmico, ao que asociará un identificador ResearcherID.

    • Problema que pode xurdir: que duplique rexistros

  • Rexistros verificados/reclamados/validados (claimed). Son aqueles rexistros que un/unha autor/a reclamou ou verificou como seus.
    • Potencial problema: que xa validases previamente un perfil desde outra conta de correo.

 

Que pasos debo seguir?

Os pasos principais para asegurarte que non se dispersa a túa produción son os seguintes:

  1. Inicia sesión en WoS (rexístrache previamente se aínda non o fixeches). Paso imprescindible. Non trates de realizar ningún tipo de acción sen iniciar sesión, xa que isto pode causar problemas, como a xeración de perfís adicionais. Ademais, podes seleccionar, se o desexas, no menú superior o idioma: español.

  2. Verifica se xa tes un perfil validado (claimed).
    1. Na páxina principal de WoS (coa sesión iniciada), se xa tes perfil, facendo scroll cara abaixo aparecerá a mensaxe "Dámoslle a benvida de novo, ....!" co ResearcherID enlazable ao perfil.
    2. Tamén o poderás ver coa sesión iniciada despregando o menú da esquerda e pulsando en "o meu perfil de investigador".

  3. Busca polo teu nome. Se aínda non verificaches o teu rexistro, búscate desde a páxina principal seleccionando no buscador a pestana "Investigadores". Pon, por exemplo, no campo "apelidos" o teu primeiro apelido seguido dun asterisco e no campo "nome" o teu primeiro nome de pila seguido de asterisco (e/ou a inicial). Desta forma, se tes rexistros de autor duplicados, poderás velos todos. Por desgraza, WoS pode seguir xerando rexistros duplicados no futuro, polo que recomendamos que, polo menos unha vez ao ano, repitas esta procura.

  4. Valida o teu perfil. Se ao realizar a procura polo teu nome só aparece un rexistro de autoría, reclámao. Se aparecen varios, valida o máis completo.

  5. Fusionar rexistros duplicados. Hai ata 4 modos diferentes de engadir publicacións (e eliminar rexistros duplicados):

    1. Dede o perfil validado premer en "Revisar perfís que coinciden" (non funciona moi ben). Non o recomendamos.

    2. Reclamar segundos e terceiros rexistros de autoría (a mellor opción). Ao reclamar un segundo perfil, ábrese unha pantalla na que che permite engadir ao teu rexistro validado as publicacións incluídas nese perfil. Hai que pulsar no botón "engadir" (add) para cada publicación. Desta maneira (hai que esperar 1 semana), as publicacións pasarán ao teu rexistro validado previamente e o rexistro algorítmico desaparecerá (se se reclaman todas as publicacións). Esta é a vía máis segura, a recomendada, xa que tes un control exacto sobre que estás a engadir e a que rexistro concreto.

    3. Solicitar fusionar perfís. Simplemente, desde a páxina de resultados de investigador/a, marca os rexistros que consideras duplicados e pulsa en "Fusionar rexistros". É unha opción menos recomendada, xa que se perde un pouco o control sobre todo o que estás a facer, ao contrario que coa vía anterior.

    4. Reclamar publicacións individualmente. Se o teu último artigo está indexado en WoS, pero non aparece no teu rexistro, podes buscalo, entrar no rexistro do traballo e reclamalo. Nunha semana aparecerá incluído no teu perfil. Este sistema tamén é moi seguro.

 

Edita e xestiona o teu perfil?

Unha vez que validaches o teu rexistro e engadiches as publicacións indexadas en WoS que tiñas noutros rexistros etc., toca puír o perfil. Para iso desprega o menú da esquerda da pantalla de WoS > O meu perfil de investigador > editar perfil. Ábrese unha pantalla de configuración cun menú superior con catro elementos. Escoller "Editar perfil". Algunhas claves para ter en conta son as seguintes:

configuracion_perfil_WoS

  • Engade a túa foto (opcional).
  • Edita a túa firma normalizada. É un "must". Pódese modificar manualmente. A firma débela utilizar de forma consistente. Asegúrate que a deixas igual a como firmas habitualmente, como aparece destacado na túa ORCID, etc.
  • Nomes alternativos (published names). Non é editable e componse coas variantes do teu nome que aparecen nos traballos indexados por WoS. Recomendamos mantelo activo para que poidan visualizarse.
  • Filiacións. Importante tamén. Trátase dun despregable. Engade á caixa "Coruña" e escolle "Universidade da Coruña". Só permite engadir unha filiación.
  • Filiacións históricas. Cóbreas por defecto WoS coa información das túas publicacións. Recomendamos que non desactives esta función porque tamén axuda a unha correcta identificación.

 

Engadir publicacións que non se atopan en WoS

É posible facelo, aínda que a súa utilidade é limitada. Desde o menú da esquerda > Os meus rexistros > Publicacións > Engadir. Podes engadir publicacións por identificador (DOI), o máis recomendable; engadir publicacións por subida de arquivo, tipo RIS ou BibTex - non se recomenda -; ou importar as publicacións desde ORCID.

 

Rexistrar actividades de revisión ou de edición en revistas científicas

Unha das grandes vantaxes do WoS ResearcherID, respecto a outras bases de datos, é que permite, desde o propio perfil, engadir rexistros de actividades de revisión.

Onde? Desde o despregable da esquerda > Os meus rexistros > Revisións de pares > Engadir.

Tamén é interesante que consultes a configuración sobre esta información no voso rexistro desde o despregable da esquerda > O meu perfil de Investigador > Editar. Ábrese unha pantalla cun menú superior con catro elementos. Escolle "Preferencias de revisión por pares".

Nalgún caso vas ter que enviar documentación xustificativa. Podes ver o seguinte vídeo de Web of Science onde explican paso a paso como proceder: "Las revisiones por pares: su importancia y visibilidad en los perfiles de investigadores".

 

Enlaza o teu ResearcherID co teu ORCID

Fundamental. Unha vez validado o teu rexistro, reclamados todos os teus traballos e editado o perfil, é máis que recomendable sincronizar este identificador co ORCID.

Para iso, unha vez máis, tes que ir ao Menú despregable da esquerda > O meu perfil de investigador > Editar. Ábrese a pantalla de configuración que xa coñecemos e movémonos polo menú superior pulsando na frecha dereita para que se visualice o último elemento do menú: "Sincronización de ORCID".

Podes configurar a sincronización para que, ademais, se actualicen os rexistros, no sentido que se se incorpora unha nova publicación nun dos identificadores, automaticamente tamén se vexa no outro. Estas actualizacións pódense configurar nun só sentido (de WoS a ORCID ou de ORCID a WoS) ou en ambos. Nós recomendamos polo menos activar a actualización automática en sentido de WoS a ORCID.

Vantaxes da sincronización? Ademais das actualizacións automáticas vistas - se se activan desde configuración- será máis difícil que WoS xere rexistros de autor/a duplicados para as túas novas publicacións.

 

E listo!

Lembra revisar periodicamente o teu perfil, comprobar que se engaden as túas últimas publicacións correctamente e que WoS non che xera rexistros duplicados.