A filiación institucional na UDC

Por que é importante

A filiación institucional reflicte a vinculación formal do persoal investigador cunha organización ao longo do tempo.

Cumpre múltiples funcións, polo que é moi importante asegurarse de que todos os documentos científicos que se publican inclúan sempre a filiación institucional á UDC.

Por exemplo, canto máis xenérica sexa a vosa firma de autor/a, máis importante para unha identificación unívoca serán os datos de filiación institucional.

Pero ademais, unha consignación inexacta dos datos de filiación nas vosas publicacións:

  • Prexudica á institución ao dispersar a súa produción científica nas bases de datos, dificultando así a correcta atribución e visibilidade da universidade.
  • Menoscaba o posicionamento da institución nos rankings e, por tanto, dana a obtención de financiamento externo.
  • Obstaculiza a análise precisa de datos para a toma de decisións en política científica (tanto por parte da propia universidade, como de entes superiores).

 

Elementos obrigatorios

Segundo a Instrución da UDC, son elementos obrigatorios que nunca deben faltar nos datos de filiación:

  • "Universidade da Coruña", na súa denominación oficial (en galego) tal como se indica. Complementariamente - e só complementariamente - poderase engadir o nome en inglés (University of A Coruña).

  • Dirección. Polo menos, o código postal, a cidade e o país. O nome do país pode ir en castelán ou en inglés.

Outros elementos como o grupo de investigación, departamento, ou Facultade son opcionais e poderían consignarse en galego, castelán ou inglés.

 

Filiación múltiple

Que pasa - e isto é moi común na FIC - se queredes consignar a filiación a un centro de investigación como o CITIC, pero tamén a Facultade de Informática?

Neste caso e, segundo a Instrución da UDC, deberíase consignar unha segunda filiación, pero non deberían mesturarse ambos os centros nunha soa.

 

Modelo xeral

Nome do Investigador [http://orcid.org/0000‐0000‐0000‐0000]
Universidade da Coruña, Grupo de Investigación /Departamento/Instituto/Facultade/Escola (segundo sexa
aplicable), Nome do Centro e zona do campus (Elviña/ Zapateira/ Oza/ Bastiagueiro/ Riazor/ Esteiro,
Serantes), 15071 A Coruña / 15471 Ferrol (segundo proceda), España/Spain (segundo proceda)

 

Exemplos

1. Exemplo de filiación indicando a Facultade de Informática

Nome do Investigador [http://orcid.org/0000‐0000‐0000‐0000]
Universidade da Coruña, Models and Applications of Distributed Systems (MADS), Faculty of Computer
Science, Elviña, 15071 A Coruña, Spain

2. Exemplo de doble filiación (CIT e Facultade de Ciencias)

Nome do Investigador [http://orcid.org/0000‐0000‐0000‐0000]
(1) Universidade da Coruña, Grupo de Polímeros, Centro de Investigacións Tecnolóxicas (CIT), Esteiro, 15471
Ferrol, Spain
(2) Universidade da Coruña, Departamento de Física, Facultade de Ciencias, Zapateira, 15071 A Coruña,
Spain