• Iniciativa: Ministerio para a Transición Ecolóxica e Reto Demográfico (MITERD), en colaboración co Ministerio de Ciencia, Innovación e Universidades e a Conferencia de Reitores de Universidades Españolas (CRUE). A Universidade da Coruña (UDC) colabora todos os anos co programa e esta sería a IV edición, o que permite que o alumnado da UDC poida facer prácticas curriculares ou extracurriculares en municipios de zonas rurais con problemas de despoboamento (< 5000 habitantes) en empresas, asociacións, fundacións etc, de forma preferente, en zonas que estean ubicadas fóra da Provincia da Coruña.

• Filosofía do programa: Apoiar a loita contra o risco de despoboamento de zonas rurais; que o alumnado universitario viva unha auténtica experiencia de inmersión cultural á par que desenvolve competencias tanto específicas coma transversais propias dos seus estudos e que contemple para o futuro outras posibilidades de emprego máis aló de zonas máis poboadas e industrializadas. 
• Tal e como se establece na convocatoria, o alumnado beneficiario das prácticas terá que residir no mesmo municipio en que as realice; se isto non é posible, poderá residir en municipios de similares características situados a unha distancia non superior a 20 km do sitio de prácticas, co visto bo da Universidade (+ info na convocatoria).
• Terán preferenza aquelas prácticas realizadas fóra da Provincia da Coruña do listado de ofertas das entidades que figuran no Anexo I da convocatoria. Hai entidades que facilitan ou axudan na procura de aloxamento e, sempre que sexa posible, darase preferenza ás prácticas ofertadas por estas entidades. 

Preme nas seguintes imaxes para acceder á convocatoria e as ofertas das entidades e ao formulario de inscrición; ademáis tes un esquema coas datas clave no proceso de adxudicación que deberás ter en conta, información sobre a elección das datas de inicio e fin das túas prácticas e algunhas recomendacións xerais (que responden á convocatoria).

O Programa de Prácticas Campus Rural está subvencionado polo MITERD (Ministerio de Transición Ecolóxica e Reto Demográfico) nun 90% e a UDC nun 10%. As entidades colaboradoras (empresas, entidades públicas, asociacións, fundacións etc) non terán que asumir custo algún xa que o programa é totalmente gratuíto para elas. A UDC realizará a selección das prácticas no marco da capacidade autoorganizativa e poderá adoitar criterios propios de selección, así como aqueles para xestionar os casos de renuncia.