A Oficina para a Igualdade de Xénero (OIX) oferta formación específica en igualdade e prevención das violencias machistas para toda a comunidade da Universidade da Coruña (UDC). Esta formación inclúese nos plans de formación da Unidade de Formación e Asesoramento (UFA) do Centro Universitario de Formación e Innovación Educativa (CUFIE). Intégrase, doutro lado, nas accións previstas no III Plan de igualdade da UDC, aprobado polo Consello de Goberno o 20/12/2023, no terceiro eixe, sobre formación, sensibilización e comunicación.

Con tales cursos e seminarios, a OIX pretende darlles resposta ás preguntas sobre que é e que significa a igualdade de oportunidades entre mulleres e homes, ou mellorar o coñecemento desta igualdade, integrándoa na práctica do día a día da UDC, tanto na actividade docente, discente e do persoal técnico, de xestión e de administración e servizos como no ámbito persoal. A participación proveitosa neles dará dereito a un certificado expedido pola UDC, asinado polo CUFIE ou a vicerreitora de Igualdade e Diversidade e a directora da OIX, segundo proceda.