• A peza gañadora foi realizada polo alumnado de 1º de ESO do Colexio Padre Feijoo-Zorelle de Ourense, unha proposta que fomenta as vocacións STEM entre as mozas e combate os estereotipos de xénero
• O acto celebrouse no marco da Semana do Día Internacional das Nenas nas TIC

A Coruña, 23 de abril de 2026

A Cátedra ALDABA-WIB fixo entrega do I Premio “Vídeos pola Igualdade” ao alumnado de 1º da ESO do colexio Padre Feijoo-Zorelle de Ourense, polo vídeo titulado “Supertech”, nun acto celebrado no propio centro educativo.

Esta iniciativa enmárcase na aposta da Cátedra por fomentar a igualdade de xénero no ámbito tecnolóxico, coincidindo coa celebración da Semana do Día Internacional das Nenas nas TIC, que se conmemora cada ano o cuarto xoves de abril.

O vídeo gañador, “Supertech”, presenta a figura dunha superheroína que asume a misión de situar “no mapa” ás mulleres con vocacións STEM. A través dunha narrativa próxima e participativa, a peza audiovisual consegue transmitir unha mensaxe clara: a tecnoloxía tamén é un espazo para as mulleres.

O xurado, formado pola Dirección da Cátedra, valorou especialmente a orixinalidade da proposta, a forza do seu discurso, a calidade da realización e a súa perspectiva de igualdade. O traballo destaca por abordar un tema complexo cunha linguaxe accesible, empregando a creatividade, o humor e o traballo colaborativo para romper estereotipos e fomentar referentes femininos no ámbito tecnolóxico.

Durante o acto de entrega, representantes da Cátedra puxeron en valor non só o resultado final do proxecto, senón tamén o proceso educativo que hai detrás, destacando o traballo en equipo do alumnado e o acompañamento do profesorado. Así mesmo, subliñaron a importancia de impulsar este tipo de iniciativas desde as etapas educativas iniciais, onde se constrúen as vocacións e os referentes.

O premio, destinado a apoiar ao centro educativo, consistirá en material educativo e tecnolóxico que contribuirá a seguir fomentando o desenvolvemento de competencias dixitais e creativas no alumnado.

Próximas actividades en 2026

Tras este recoñecemento, a Cátedra ALDABA-WIB continuará desenvolvendo o seu calendario anual de actividades co obxectivo de reforzar o vínculo entre sociedade, universidade e empresa. Entre as iniciativas previstas destacan:

• ALDABA TIC-Camp, que fomenta o interese pola tecnoloxía desde idades temperás, reservando o 80% das prazas para nenas.
• I Premios TFG ALDABA-WIB, orientados a recoñecer traballos universitarios que contribúan a reducir a fenda de xénero.
• Actualización do Barómetro BBG-TIC, coa incorporación dos datos do curso 2025/2026 para analizar a evolución da presenza feminina nos estudos TIC.
• Programas VisibilizaTIC e charlas divulgativas, centrados na orientación en Bacharelato e na aplicación práctica das TIC no ámbito empresarial.
• Programa de bolsas, co que ALDABA continuará impulsando o talento novo mediante a participación do estudantado en proxectos reais da compañía.

Sobre a Cátedra ALDABA-WIB

A Cátedra ALDABA-WIB foi creada no ano 2019 e promove a colaboración entre universidade e empresa para avanzar cara a un sector tecnolóxico máis igualitario, diverso e humano. Entre as súas liñas de actuación destacan o impulso do talento feminino nas TIC e o apoio ao estudantado para facilitar a súa inserción laboral.

Máis información sobre a Cátedra e a súas iniciativas.