Este folleto do ano 1949, titulado Reglamento por el que se han de regir los veinticinco, chama a atención polo seu nivel de sofisticación e detalle á hora de fixar as bases para participar nun sorteo vinculado á Lotería Nacional. Tanto é así, que se establecían un total de 12 disposicións para recoller todo tipo de casuísticas que puidesen xurdir; desde o importe para aboar, os prazos de pagamento, a identificación dos socios, o sistema de repartición dos premios por contía..., ata a perda da condición de membro ou como xestionar a reposición das vacantes.

O documento foi editado pola Imprenta Valladares, situada no Cantón Pequeno, e cada persoa da agrupación dispuña dun exemplar propio e singularizado, en que constaban o seu nome e os apelidos, o número de título que lle correspondía e as 4 terminacións con que participaría en cada sorteo. Este, en concreto, correspóndese co título 14, outorgado a José Lago Martínez.

Descrición física
Título: Reglamento por el que se
han de regir los veinticinco
Data de creación: 1949
Volume e soporte: 1 folleto de 8 páxinas,
de 7,7x11,5 cm
Estado de conservación: bo