As placas de vidro son láminas fotográficas ou ilustradas, normalmente de formato 8,5x10 cm ou 10x12 cm, que se empregaban como transparencias proxectadas con lanternas máxicas. Foron moi relevantes no ensino desde finais do século XIX ata mediados do XX, ata que de xeito paulatino foron substituídas polas diapositivas en celuloide.

Esta colección da Escola de Comercio consta de 342 placas de temática moi variada. Entre elas, hai fotografías e ilustracións de xeografía, de zooloxía e botánica, de astronomía ou de arte. Cabe salientar a existencia dalgunhas imaxes das rías galegas: fotografías de barcos, do marisqueo ou mesmo de estaleiros.

En moitas das placas, hai constancia do produtor-distribuidor (Benzinger, Lichtbilderverlag, Stuttgart) e noutras figuran as empresas distribuidoras (Sogeresa e Projectións E. Mazo).

Descrición física
Produtor-distribuidor: Th. Benzinger,
Lichtbilderverlag, Stuttgart
Data de creación: [1920-1950]
Volume e soporte: 342 fotografías de 84x99 mm,
de cristal, positivo, branco e negro
Estado de conservación: bo