Arquitectura, paisaxe, turismo

Datas importantes provisionais

O I Congreso Científico Transnacional: Patrimonio Marítimo Atlántico e Turismo Azul nace co propósito de profundar nas interrelacións entre as construcións e paisaxes litorais asociadas á cultura marítima e o turismo sostible vinculado ao océano e a costa. Este encontro propón unha reflexión conxunta sobre as arquitecturas do mar, as súas paisaxes e as formas en que estes elementos patrimoniais dialogan coas dinámicas turísticas contemporáneas.

Tomando como eixo condutor o bordo atlántico europeo, o congreso enmárcase no proxecto SEALabHaus, que promove unha mirada integrada de arquitectura, arte, cultura, turismo, sustentabilidade, profesionalización e formación. Polo que a interconexión entre patrimonio marítimo e turismo azul non só revela novas oportunidades de desenvolvemento, senón tamén desafíos que requiren enfoques transdisciplinares e colaborativos.

Galicia, coa súa rica tradición marítima, cun bordo litoral modificado polas arquitecturas do mar e a súa aposta por un turismo respectuoso coa contorna, convértese no escenario ideal para este encontro. A cidade da Coruña, sede do evento, destaca pola súa vinculación histórica co mar e polo papel activo da súa universidade como estandarte do coñecemento e a innovación neste ámbito.

Este congreso convida a investigadores de diversos ámbitos a compartir experiencias, xerar sinerxias e reflexionar xuntos sobre o futuro desde a costa atlántica.