Colaborar con persoal investigador permíteche acceder ás súas capacidades e coñecementos científicos, técnicos e artísticos, ademais de a recursos, infraestruturas e tecnoloxías avanzadas sen necesidade de realizar investimentos directos. Así mesmo, garántese o rigor científico e a calidade nos servizos e resultados.

Existen contratos ao abeiro do artigo 60 da Lei Orgánica do Sistema Universitario, que regulan a prestación de servizos e a transferencia de tecnoloxía. Estes contratos adáptanse ás túas necesidades, incluíndo proxectos de investigación aplicada, servizos de laboratorio ou estudos técnicos.

 A este tipo de contratos élles de aplicación o Regulamento para a contratación de servizos científicos, técnicos, artísticos ou docentes.

Podes contactar con nós, a Oficina de Transferencia de Coñecemento da UDC para definir os obxectivos, o alcance do proxecto e os recursos necesarios.  Asesorarémoste na elaboración do contrato e na xestión dos aspectos administrativos e legais.

A UDC garante a confidencialidade dos proxectos e a posibilidade de establecer acordos sobre a propiedade dos resultados xerados. Ademais, os contratos réxense por un marco legal que garante seguridade xurídica para ambas partes.