Horizonte Europa é o programa marco de investigación e innovación (I+i) da Unión Europea (UE) para o período 2021-2027. O Programa Horizonte Europa, do mesmo xeito que o seu antecesor Horizonte 2020, será o instrumento fundamental para levar a cabo as políticas de investigación da UE. O obxectivo xeral do programa é lograr un impacto científico, tecnolóxico, económico e social dos investimentos da UE en I+i, reforzando así as súas bases científicas e tecnolóxicas, e fomentando a competitividade de todos os Estados membros.

Cun orzamento de 95.517 millóns de euros para este período de sete anos, Horizonte Europa será o programa marco con maior orzamento ata a data, con potencial para xerar importantes beneficios económicos, sociais e científicos. Estímase que Horizonte Europa, por cada euro investido, xerará 11 euros de aumento do produto interior bruto (PIB), creará ata 320.000 novos postos de traballo altamente cualificados para 2040 e consolidará o liderado europeo en Investigación e Innovación. O programa está deseñado cunha mentalidade de investimento en lugar dun instrumento puramente financeiro, e planificado para axudar á transición da UE cara un futuro próspero e sostible.