A Coruña, 12 de abril de 2024.- O cómic "Irene, a porteira", publicado polo Servizo de Publicacións da Universidade da Coruña, atópase entre os finalistas do I Premio de Banda Deseñada dos Escolares "Tinta de Lura", que se entregará no Salón do Cómic de Cangas o cal terá lugar do 12 ao 19 de xullo.

A publicación rescata a historia de Irene González Basanta, unha coruñesa que xogou ao fútbol nos anos vinte do pasado século, sendo a primeira rapaza en romper barreiras neste deporte, ao se converter na porteira e capitá do equipo masculino coruñés ao que deu nome: o Irene F.C.

A obra, creada pola debuxante Xulia Pisón e o xornalista  Óscar Losada, compite na categoría en idioma galego cos traballos "Os suicidantes", de Diego Ameixeiras e Tomás Guerrero; e "Cinza", de Manuel Cráneo.

O xurado do premio, composto por estudantes dos IES Rodeira (de Cangas), A Paralaia (de Moaña) e Pino Manso (do Porriño), decidirán o vencedor do certame en xuño.                                                                                                         

A edición de "Irene, a porteira" por parte do Servizo de Publicacións, dependente da Vicerreitoría Divulgación, Cultura e Deporte da UDC, contou coa colaboración da Xunta de Galicia, o Concello da Coruña, Supermercados Gadis e In the Corner.