• O Centro de Investigación en Tecnoloxías da Información e as Comunicacións (CITIC) da UDC traballa en proxectos, elaboración de currículos e contidos e na creación de ferramentas de IA para o seu uso no ámbito educativo que abarca desde a Primaria ata a Universidade.
• O investigador do CITIC, Francisco Bellas, falará o 4 de xuño sobre “Educación na era da Intelixencia Artificial: vaiamos a modo”.
• A conferencia impartirase dentro da segunda edición do Ciclo de Cultura Científica que comeza mañá, 4 de abril, promovido pola Xunta de Galicia co fin de abordar o impacto da tecnoloxía nas aulas.

A Coruña, 3 de abril de 2024.- O investigador do CITIC, Francisco Bellas, leva máis dun lustro traballando no desenvolvemento de currículos e ferramentas para a educación en Intelixencia Artificial (IA), un ámbito no que o uso das tecnoloxías está sendo obxecto dun amplo debate na actualidade. O científico considera que a formación en IA debe estar incluída no Plan de Educación Dixital, ten que comezar na Educación Primaria e cubrir todas as etapas posteriores, xa que esta vai ser fundamental para as futuras xeracións. Igualmente, cre que unha formación nas bases da IA debe ter como primeiro destinatario ao profesorado, “que debe comprender que é, as súas vantaxes e os seus riscos, porque eles son os primeiros que deben ter eses coñecementos para formar ao alumnado. Porén, necesitan un plan estruturado, medios e apoio para levalo a cabo”, sinala Bellas. 

De feito, o CITIC a través dos seus investigadores Francisco Bellas e Sara Guerreiro, atópase traballando en diversos proxectos de Intelixencia Artificial no ámbito educativo, que abarcan desde a Primaria ata a Universidade, incluída a Formación Profesional. Dous deles forman parte do programa da UE Eramus+, que permitiron á UDC crear unidades formativas de IA que logo foron aplicadas en centros escolares de varios países europeos. Así mesmo, os investigadores forman parte dun grupo de traballo da Consellería de Educación para o deseño de contidos e materias de IA para o currículo oficial.

Neste senso, a alfabetización en IA para a mocidade é unha das estratexias claves para o CITIC da UDC, que conta con diversas liñas de investigación destinadas a favorecer a divulgación, a integración e o uso axeitado das novas ferramentas tecnolóxicas, entre elas o robot educativo Robobo, que se desenvolveu para dar resposta á escaseza de instrumentos neste ámbito. Porque, tal e como sinala Francisco Bellas, “o impacto da IA require tempo. Primeiro, hai que facer unha análise ética para ver como esas ferramentas se van incorporando na educación, pero sempre dun xeito paulatino. As ferramentas de IA deben axudar no proceso, é dicir, o alumno debe aprender coa IA, non que a IA aprenda por el”. Precisamente, neste punto vai incidir a conferencia que o investigador do CITIC impartirá dentro do II Ciclo de Cultura Científica promovido pola Xunta de Galicia, coa finalidade de analizar distintos aspectos relacionados co uso das tecnoloxías nas aulas e a súa relación coa aprendizaxe dos estudantes, que comeza este xoves 4 de abril en Santiago de Compostela.

Tecnoloxía con sentidiño

No marco deste ciclo de conferencias divulgativas que leva por título “Tecnoloxía con sentidiño”, o investigador do CITIC, Francisco Bellas, falará sobre “Educación na era da Intelixencia Artificial: vaiamos a modo” o vindeiro 4 de xuño, nunha conferencia que poderá seguirse tanto de xeito presencial, no auditorio Neira Vilas da Biblioteca de Galicia, como en streaming a través da canle de Youtube da Consellería de Educación, Formación Profesional e Universidades.

Francisco Bellas recorda que o impacto da IA na educación ten “especial relevancia, xa que cambiará o xeito de ensinar coa tecnoloxía” , sen perder de vista que “o profesor debe estar sempre no centro”. Tamén destaca que coas ferramentas da IA pasará “como no seu día coa calculadora, que acabarán sendo un apoio no proceso de aprendizaxe”. Neste senso considera que as intelixencias artificiais xerativas como o ChatGPT deben integrarse no sistema educativo, xa que a súa prohibición non será posible, pero para iso será necesario cambiar parte das metodoloxías actuais. “Veñen tempos de cambio, pero poden xerar moitas oportunidades. Eu estou convencido de que se se poñen os medios necesarios o profesorado subirase á roda da IA”, conclúe o investigador do CITIC, quen resalta a aposta do Centro de Investigación TIC da UDC pola integración da Intelixencia Artificial en todos os niveis educativos.

Foto: o investigador do CITIC da UDC, Francisco Bellas.