• Belén González Costea Llamas e Laura Camila Velasco Ortega, alumnas do Máster en Tecnoloxía Téxtil e Moda Sustentable da EPEF, viaxaron ata Barcelona para participar na sétima edición dun maratón organizado por MODA-FAD. 

• As dúas mozas representaron á Universidade da Coruña (UDC) xunto a outros 28 estudantes ciclos de formación profesional, graos e/ou másters vinculados ao sector da moda de Alemaña, Bosnia e Hercegovina, España, Países Baixos, Reino Unido, Romanía e en Serbia.

Ferrol, 24 de novembro de 2025.- Belén González Costea Llamas (Cartagena, Murcia, España – 1998) e Laura Camila Velasco Ortega (Bogotá, Colombia – 2000), alumnas do Máster en Tecnoloxía Téxtil e Moda Sustentable, titulación que se imparte na Escola Politécnica de Enxeñaría de Ferrol (EPEF) do Campus Industrial de Ferrol, veñen de participar, xunto a outros 28 estudantes de ciclos de formación profesional, graos e/ou másters vinculados ao sector da moda en Alemaña, Bosnia e Hercegovina, España, Países Baixos, Reino Unido, Romanía e en Serbia, na sétima edición do Sustainable Challenge, un maratón creativo que tivo lugar, do 12 ao 15 de novembro, no  Disseny Hub Barcelona, da man da Asociación para o Fomento da Moda (MODA-FAD).

Baixo o título “Collective Mending” e durante catro días, os 30 mozos e mozas seleccionados, divididos en seis equipos mixtos e internacionais, aproveitaron a roupa desbotada proporcionada pola cooperativa Roba Amiga, proxecto referente en Cataluña na recollida e xestión do téxtil postconsumo, experimentaron co remendo, co patchwork, coa reasignación de uso, co up-cycling e máis coas narrativas do residuo transformado. Todo isto, baixo a titorización de persoas expertas en reparación e moda como son a comisaria do proxecto, Amy Twigger Holroyd, a artista e serigrafista Martina Mefano, o facilitador e investigador Mats Siffels, e a deseñadora Penny Papachristodoulou.

O último día do maratón, os seis equipos presentaron súas pezas transformadas sobre modelos reais. Os looks creados por este grupo de 30 estudantes poderase visitar, de xeito totalmente gratuíto, no Disseny Hub Barcelona, ata marzo de 2026. Tal e como indican desde a organización, nesta edición, o obxectivo non era outro máis que “reflexionar sobre o futuro do sector da moda desde a perspectiva da sustentabilidade como resposta ao actual sistema dominado pola sobreprodución e o consumo excesivo”.

O Programa Sustainable Challenge está organizado pola Asociación para o Fomento da Moda (MODA-FAD) en colaboración co Ajuntament de Barcelona, o Disseny Hub de Barcelona, a Generalitat de Catalunya, a Embaixada en España dos Países Baixos e o British Council.

Representando á Universidade da Coruña (UDC) como integrantes dos equipos Motion e Shūri

Belén González Costea Llamas participou na sétima edición do Sustainable Challenge como integrante do Equipo Motion. Esta graduada en Enxeñaría Biomédica pola Universidade Politécnica de Madrid (UPM) e actual alumna do Máster en Tecnoloxía Téxil e Moda Sustentable na Escola Politécnica de Enxeñaría de Ferrol (EPEF) da Universidade da Coruña (UDC) traballou man a man con Martina Otero Jeandrevin, da Escola Massana (Barcelona, España), con Maya Ceplenschi, da Universitatea de Vest din Timişoara (Timişoara, Romanía), Berke Rizalar, da Willem de Kooning Academy (Rotterdam, Países Baixos) e con HuanTsun Su, da Central Saint Martins (Londres, Reino Unido).

Pola súa banda, Laura Camila Velasco Ortega formou parte do Equipo Shūri. A moza, titulada en Deseño pola Universidad de los Andes (Colombia) e actual alumna do Campus Industrial de Ferrol, compartiu coñecementos e experiencias xunto con Pelayo de Bernardo, do IED Instituto Europeo di Desing (Madrid, España), con Nikola Vranić, da University of Arts (Belgrado, Serbia), Elcke Hartjes, da Willem de Kooning Academy (Rotterdam, Países Baixos), e máis con Ada de Dalmases i Pedró, de ESDI School of Desing (Sabadell, España).

Foto 1: Belén González Costea Llamas e Laura Camila Velasco Ortega diante da Escola Politécnica de Enxeñaría de Ferrol (EPEF), centro no que se imparte o Máster en Tecnoloxía Téxtil e Moda Sustentable.

 Foto 2 (5LOOK_8465): Look do Equipo Motion no que falan de “reinventar a peza mediante plegues, volúmenes y xestos que lle outorgan un novo valor estético e emocional”. Foto Anne Galán, cortesía de Fucking Young! & Vein Magazine

 Foto 3 (2LOOK_8715): Look do Equipo Shūri no que valoran de novo pezas existentes para crear siluetas suaves inspiradas nos drapeados do kimono e en formas contemporáneas. Integra técnicas tradicionais como boro e sashiko, reinterpretadas con procesos modernos de sobreimpresión. Foto Anne Galán, cortesía de Fucking Young! & Vein Magazine