A Coruña, 22 de decembro de 2022.- Tres centros de investigación da Universidade da Coruña, o Centro de Innovación Tecnolóxica en Edificación e Enxeñaría civil (CITEEC), Centro de Investigacións TIC (CITIC) e o Centro Interdisciplinar de Química e Bioloxía, (CICA), veñen de captar un total de 333.500 euros na convocatoria “Prueba de concepto” do Ministerio de Ciencia e Innovación.

O Ministerio, a través da Agencia Estatal de Investigación, concedeu preto de 40 millóns de euros a 356 proxectos nesta convocatoria financiada con fondos europeos do Plan de Recuperación, Transformación e Resiliencia. O CITEEC recibe 138.000 euros; o CITIC, 126.500 euros e o CICA, 69.000 euros.

O obxectivo desta convocatoria é impulsar proxectos que permitan acelerar a transformación de ideas, coñecementos ou resultados científicos en produtos, bens, aplicacións ou beneficios para a economía, a sociedade, a cultura, as políticas públicas ou os servizos.

Así mesmo, estas axudas pretenden fomentar a transferencia de coñecemento entre os actores públicos e privados do Sistema de Ciencia, Tecnoloxía e Innovación, así como incrementar as capacidades de divulgación e comunicación da I+D+i á sociedade.