• O curso está deseñado para dotar ao alumnado das competencias linguísticas que lle permitan acceder a estudos de máster na UDC o vindeiro curso académico.
• Esta e a décima edición do programa, que leva formado a 193 estudantes.

A Coruña, 15 de xaneiro de 2026

A Universidade da Coruña (UDC) vén de inaugurar no Centro Universitario de Riazor (CUR) o novo curso intensivo de inmersión lingüística en español dirixido especificamente a estudantado procedente de China.

Este programa, cunha duración de 700 horas, correspóndese cos diferentes niveis do Marco Común Europeo de referencia para as linguas do Consello de Europa. Está deseñado para 13 estudantes e ten como obxectivo principal dotar ao alumnado das competencias lingüísticas (comprensión auditiva e lectora, e expresión oral e escrita) e culturais necesarias para superar as barreiras idiomáticas.

A formación constitúe un paso previo indispensable para que poidan acceder á ampla oferta de posgrao da UDC e cursar con éxito estudos de máster nas distintas facultades no próximo curso académico 2026/2027.

Proceso de aprendizaxe

Os estudantes atoparanse durante estas semanas de formación un modelo de docencia con clases teóricas e prácticas que permitan crear un proceso de ensino-aprendizaxe adaptado ás necesidades reais do alumnado en contexto de inmersión, combinando tarefas controladas e semicontroladas para que o alumnado interiorice as estruturas e funcións da lingua con outras actividades como presentacións orais, debates, simulacións e xogos de rol, que sirvan para perfeccionar a pronuncia e fomentar a expresión oral.

Ademais, están contempladas dinámicas de saídas culturais e traballos prácticos en grupo co obxectivo de estimular a interacción con persoas, ademais de fomentar o apoio no resto do grupo para a aprendizaxe común.

Este curso é xa a décima edición do programa, que leva formados ao longo da súa traxectoria a 193 estudantes asiáticos .