A Coruña, 10 de abril de 2023.- A Escola Técnica Superior de Enxeñaría de Camiños, Canais e Portos da Universidade da Coruña acollerá os vindeiros días 26 e 27 de abril as xornadas “Os sistemas urbanos de drenaxe sustentable (SUDS) e a renaturalización da cidade”.

Organizadas polo Grupo de Enxeñaría da Auga e do Medio Ambiente da UDC, o Instituto de Enxeñaría da Auga e do Medio Ambiente da Universitat Politècnica de Valencia, o Grupo de Investigación de Tecnoloxía da Construción da Universidad de Cantabria, e a empresa Green Blue Management, ten como finalidade analizar o potencial dos SUDS como elementos transformadores para a renaturalización das cidades e coñecer casos de éxito implantados, tanto a nivel nacional como internacional, que axuden a difundir a idoneidade e efectividade destas infraestruturas sustentables e verdes a longo prazo.

Cun formato novidoso en relación a anteriores edicións, os asistentes definirán o programa coas comunicacións, traballos e estudos enviados previamente. A Universidade da Coruña acolle por primeira vez estas xornadas que se celebraron na edición de 2021 na Universitat Politècnica de Valencia, con máis de 300 participantes; e na Asociación de Ingenieros de Caminos, Canales y Puertos, en Madrid, nas edicións de 2019 e 2017.

A cuarta cita da REDSUDS, que acolle a UDC, comezará o día 26 de abril coa presentación do proxecto SUDSlong “Mellora e xestión estratéxica dos sistemas urbanos de drenaxe sustentable para o éxito a longo prazo” e a visita ao Campus-SUDS, unha instalación piloto con varias técnicas SUDS construídas no contorno do Centro de Innovación Tecnolóxica en Edificación e Enxeñaría Civil (CITEEC) da UDC.

O día 27 terá lugar a sesión de presentacións orais centradas no potencial dos SUDS e a renaturalización das cidades, na que se tratarán traballos relacionados coa planificación e experiencias colaborativas, casos de éxito nacionais e internacionais e retos futuros da drenaxe urbana sustentable, unha técnica que xa forma parte de grandes infraestruturas e son incluídas na planificación urbana das cidades.

Que é REDSUDS?

REDSUDS é unha rede de colaboración nacida en 2008 dun proxecto de difusión levado a cabo polo Grupo de Investigación de Tecnoloxía da Construción da Universidad de Cantabria, co apoio da Sociedade Rexional de I+D+i de Cantabria, co obxectivo de ser un foro para a discusión e a difusión do coñecemento que permita a xeralización do uso dos SUDS en España.

En 2016, este grupo e o Instituto de Enxeñaría da Auga e do Medio Ambiente da Universitat Politècnica de Valencia iniciaron o desenvolvemento conxunto dunha liña de investigación baixo o Programa Estatal de I+D+i Orientada aos Retos da Sociedade do Ministerio de Economía. En colaboración con Green Blue Management decidiron relanzar RedSUDS co obxectivo de impulsar o cambio de paradigma en España, desde a óptica convencional da drenaxe urbana cara unha drenaxe que incorpore aos SUDS como solución habitual, consolidando un grupo de profesionais interesados nos SUDS en España e vencer as barreiras institucionais existentes. En 2019 uniuse aos coordinadores de REDSUDS o Grupo de Enxeñaría da Auga e do Medio Ambiente da UDC.