A semana comezou o luns 18 de maio cun vídeo protagonizado por tres alumnas da ETSNM que actualmente representan distintos ámbitos da formación marítima: Máquinas, ETO e Ponte.

Participaron Maytana Díaz, alumna do Grao en Máquinas Navais; Lucía Díaz, alumna do Grao en Máquinas Navais en formación dentro do ámbito de oficial electrotécnica / ETO; e María Núñez, alumna do Grao en Náutica e Transporte Marítimo.

A través das súas intervencións, as alumnas trasladaron unha mensaxe sinxela e directa: o sector marítimo ofrece oportunidades de formación, crecemento profesional e participación nunha actividade esencial para a sociedade. Tamén destacaron a importancia de recoñecer a quen abriu camiño antes, a quen hoxe está a bordo, a quen se está formando e ás futuras xeracións de mulleres que se incorporarán ao sector marítimo.

Con este primeiro vídeo, a Escola quixo situar no centro da conmemoración as alumnas que hoxe se forman para traballar na mar e que representan o futuro da mariña mercante.

Ligazón a LinkedIN alumnas en prácticas                                             Ligazón a Instagram alumnas en prácticas

O segundo día da semana estivo dedicado a Anna Ivanovna Shchetinina (1908-1999), unha das grandes pioneiras da mariña mercante mundial.

A súa importancia non reside unicamente en ter sido unha muller ao mando dun buque, senón en ter acadado o mando profesional dun buque de navegación oceánica nunha época na que a presenza feminina en postos de responsabilidade a bordo era excepcional.

En 1935 converteuse na primeira muller capitá profesional dun buque oceánico. A Organización Hidrográfica Internacional destaca que Shchetinina chegou aos buques como mariñeira e ascendeu ata o rango de capitá, converténdose nunha figura de repercusión internacional.

Durante a Segunda Guerra Mundial traballou en rutas transoceánicas, participou en operacións de transporte e evacuou civís en condicións especialmente difíciles. Posteriormente, tamén estivo vinculada á formación marítima, contribuíndo a preparar novas xeracións de profesionais da mar.

A súa traxectoria representa valores esenciais da profesión marítima: formación, experiencia, disciplina, responsabilidade e capacidade de mando. Desde a ETSNM quíxose recordar a súa figura como símbolo das mulleres que abriron camiño na ponte e demostraron que a competencia profesional na mariña mercante non entende de xénero..

Ligazón LinkedIN Anna Ivanovna Shchetinina                        Ligazón Instagram Anna Ivanovna Shchetinina

O terceiro día dedicouse a Victoria Drummond (1894-1978), unha das grandes pioneiras do departamento de Máquinas na mariña mercante.

A súa traxectoria é especialmente significativa porque abriu camiño no ámbito da enxeñaría aplicada e fíxoo desde a sala de máquinas, un dos espazos de maior especialización técnica a bordo. Desde moi nova mostrou unha clara vocación pola maquinaria e polo traballo técnico, iniciando a súa formación en talleres e estaleiros antes de embarcar como oficial de máquinas.

Victoria Drummond foi a primeira muller membro do Institute of Marine Engineers, institución precursora do actual IMarEST, e en 1926 obtivo o certificado de Second Engineer, converténdose na primeira muller británica certificada como enxeñeira de máquinas na mariña mercante.

Porén, a súa preparación non eliminou as barreiras. Durante anos tivo grandes dificultades para acceder a postos acordes coa súa cualificación e enfrontouse a numerosos obstáculos profesionais por ser muller. IMarEST recolle que se presentou repetidamente ao exame do Board of Trade para obter o recoñecemento como xefa de máquinas e que foi suspendida en numerosas ocasións, presuntamente por razón de xénero.

Durante a Segunda Guerra Mundial volveu ao mar. A bordo do Bonita, durante un ataque aéreo, chegou a quedar á fronte do departamento de Máquinas e mantivo o funcionamento do buque en condicións extremas. Pola súa actuación foi recoñecida como Membro da Orde do Imperio Británico (MBE) e coa Lloyd’s War Medal for Bravery at Sea, medalla de Lloyd’s ao valor no mar durante a guerra.

Tras a guerra continuou traballando en distintos buques e chegou a exercer como xefa de máquinas ata a súa retirada en 1962. A súa historia lembra que a preparación técnica, a vocación marítima e a responsabilidade profesional non entenden de xénero na mariña mercante.

Ligazón LinkedIn Victoria Drummond                                         Ligazón Instagram Victoria Drummond

O cuarto día estivo dedicado a Radhika Menon, capitá da mariña mercante e referencia internacional no ámbito da seguridade marítima e do liderado a bordo.

A súa relevancia non se limita a ter sido recoñecida como a primeira muller capitá da Mariña Mercante india. A súa traxectoria acadou proxección internacional en 2016, cando se converteu na primeira muller en recibir o IMO Award for Exceptional Bravery at Sea, o premio da Organización Marítima Internacional á valentía excepcional no mar.

O recoñecemento foille concedido polo rescate de sete pescadores na baía de Bengala, cando era capitá do petroleiro Sampurna Swarajya. O pesqueiro Durgamma quedara á deriva tras sufrir unha avaría de motor e perder a áncora, no medio dunha forte tormenta, sen comida nin auga a bordo.

A operación desenvolveuse en condicións extremadamente difíciles, con ondas de máis de 25 pés, ventos superiores a 60 nós e chuvia intensa. Tras varios intentos, a tripulación do Sampurna Swarajya, baixo o mando de Radhika Menon, conseguiu rescatar con vida os sete pescadores.

A súa historia representa unha das responsabilidades máis profundas do mando no mar: tomar decisións baixo presión, avaliar o risco, coordinar a tripulación e protexer a vida humana en condicións adversas. Desde a ETSNM quíxose recoñecer o seu exemplo como símbolo de liderado, seguridade marítima e compromiso coa vida humana no mar.

Ligazón LinkedIN Radhika Menon                                        Ligazón Instagram Radhika Menon

A semana pechouse cun vídeo de Idoia Ibáñez Ozores, capitá da Mariña Mercante e unha referencia fundamental na historia marítima española.

Idoia formou parte da segunda promoción de mulleres que, en 1980, puido estudar Náutica en España. Na súa mensaxe lembrou que algunhas mulleres extraordinarias da promoción anterior obtiveron o título antes ca ela, pero non tiveron a oportunidade de mandar un buque.

En 1994, Idoia Ibáñez Ozores converteuse na primeira muller con mando de buques mercantes de bandeira española, abrindo un camiño esencial para as xeracións posteriores de mulleres na mar.

A súa traxectoria reúne experiencia, responsabilidade e vocación marítima: 17 anos navegando e 22 anos dedicada á inspección Vetting de buques. Na súa intervención destacou que a formación marítima ofrece unha gran preparación non só para navegar, senón tamén para numerosos postos en terra, onde os mariños e mariñas achegan un coñecemento técnico e operativo moi valorado.

Na súa mensaxe dirixida ás alumnas, ás futuras profesionais e a todas as mulleres que hoxe comezan no sector marítimo, Idoia subliñou que o esforzo paga a pena e que as mulleres teñen un lugar propio nesta profesión.

A ETSNM agradece profundamente a súa xenerosidade e a súa participación nesta semana conmemorativa, así como o seu papel como referente para quen hoxe se forma, navega, traballa e lidera no sector marítimo.

Como ela mesma sinalou ao final da súa intervención:

“LIBRE A HÉLICE, AVANTE TODA!”

Ligazón LinkedIn Idoia Ibáñez Ozores                                Ligazón Instagram Idoia Ibáñez Ozores