Para que as universidades estatais levaran a cabo a avaliación da calidade, por iniciativa do Consello de Universidades e por proposta do Excmo. Sr. Ministro de Educación e Ciencia, o Goberno acordou mediante o Real decreto de 1997/1995, do 1 de decembro, establecer o Plano Nacional de Avaliación da Calidade das Universidades (no sucesivo PNECU), cunha duración de cinco anos, executable a través de convocatorias anuais de proxectos de avaliación institucional de calidade, presentados por universidades públicas e privadas. Preparouse unha Guía de Avaliación que servise de orientación metodolóxica para a aplicación da avaliación tanto interna como externa.
Os obxectivos do PNECU eran principalmente:

• Promover a avaliación institucional da calidade das universidades.
• Elaborar metodoloxías homoxéneas de avaliación.
• Proporcionar información obxectiva para a adopción de decisións das diferentes organizacións.

Este plano estaba orientado á mellora da calidade da institución universitaria en cada unha das súas funcións: ensino (centros ou titulacións), investigación (departamentos e institutos universitarios) e servizos (unidades de xestión ou servizos universitarios), e foi labor de cada universidade adaptar e ampliar a Guía de Avaliación á súa realidade e necesidades, establecendo os indicadores e elaborando material propio de avaliación.
A UDC, sumándose ás universidades españolas co obxectivo de mellorar a calidade docente, presentouse ás convocatorias do PNECU.
O desenvolvemento do PNECU conseguiu cumprir os tres obxectivos que se propoñía, logrando ademais a instauración da cultura da calidade nas universidades, a creación de unidades de calidade na maioría delas e a creación de axencias ou unidades de calidade nalgunhas Comunidades Autónomas.