Esta carta executoria orixinal en pergameo procede da «Sala de Hijosdalgo da Real Audiencia e Chancillería de Valladolid» e vai dirixida a Juan Alonso de Lapido, quen reclama a súa condición de fidalgo.

Durante o Antigo Réxime (s. XVI ao XVIII), moitas familias plebeas con recursos económicos tentaban probar que descendían de fidalgos para acceder a certos privilexios (exencións fiscais, dereito a portar armas, acceso a cargos eclesiásticos ou administrativos etc.). Por iso, acudían aos tribunais con testemuñas e documentos e, se a causa era favorable, emitíase a correspondente carta executoria de fidalguía.

As cartas expedíanse en pergameo miniado ou estampado e a súa validación realizábase co selo real en chumbo, suxeito ao documento con fíos de seda de cores. Esta contén ademais un debuxo en cor do escudo de armas da familia.

Descrición física
Título: Carta executoria de fidalguía
Data de creación: 1516/1519
Volume e soporte: Bifolios en pergameo
con ilustracións miniadas
Estado de conservación: regular