A Coruña, 25 de maio de 2026

Talentos Inclusivos, o proxecto impulsado desde o Centro de Investigación en Tecnoloxías da Información e das Comunicacións (CITIC) da Universidade da Coruña, que forma parte da Rede CIGUS, vén de ser distinguido co Premio Galego de Educación para o Desenvolvemento e Cidadanía Global, un recoñecemento promovido pola Coordinadora Galega de ONGD co apoio da Xunta de Galicia.

Con este galardón, o proxecto acada xa un total de once premios desde a súa creación no ano 2020, consolidando así o seu impacto no ámbito da innovación educativa, a sensibilización social e a promoción dunha cidadanía crítica e comprometida.

O Premio Galego de Educación para o Desenvolvemento e Cidadanía Global recoñece iniciativas pedagóxicas que fomentan valores vinculados á xustiza social, a sustentabilidade, a igualdade e a participación activa da comunidade educativa. A convocatoria distingue experiencias desenvolvidas en centros educativos e universitarios galegos que contribúen á construción dunha cidadanía global solidaria e responsable.

Desde o CITIC destacan que este recoñecemento “supón un impulso para seguir desenvolvendo proxectos que integren tecnoloxía, educación e compromiso social, achegando o coñecemento científico e tecnolóxico aos grandes retos globais”.

O centro reafirma así o seu compromiso coa transferencia de coñecemento e co desenvolvemento de iniciativas innovadoras que contribúan a xerar un impacto positivo tanto no ámbito educativo como na sociedade.

O Premio Galego de Educación para o Desenvolvemento e Cidadanía Global celebra este ano a súa cuarta edición e está dirixido a docentes e equipos educativos de centros e universidades galegas.

Sobre Talentos Inclusivos

Talentos Inclusivos é un proxecto desenvolvido polo CITIC (Centro de Investigación en Tecnoloxías da Información e as Comunicacións) da UDC (Universidade da Coruña) e ASPACE Coruña, e que conta co apoio da FECYT (Fundación Española para a Ciencia e a Tecnoloxía) do Ministerio de Ciencia, Innovación e Universidades; o Consello Social da UDC; o Concello da Coruña e a Xunta de Galicia.

O seu obxectivo é espertar vocacións STEM (Science, Technology, Engineering and Mathematics) entre a mocidade e dar a coñecer a realidade da discapacidade a través de equipos colaborativos de traballo para resolver retos tecnolóxicos formulados por persoas con parálise cerebral.

A través deste proxecto, estudantes de secundaria e bacharelato de diversos institutos de Galicia deberán buscar solucións tecnolóxicas a unha serie de retos que serán propostos por usuarios da entidade ASPACE Coruña, Amencer-ASPACE, APAMP e Cruz Roja A Coruña.

Talentos Inclusivos tamén conta co apoio de persoas voluntarias de Inditex, que ofrecen asesoramento no desenvolvemento dos retos.

Máis información: https://talentosinclusivos.citic.udc.es/

Sobre o CITIC

O CITIC é un centro de investigación que impulsa o avance e a excelencia en I+D+i aplicada ás TIC, creado en 2008 pola Universidade da Coruña. A actividade científica do centro estrutúrase en catro áreas principais de investigación: Intelixencia artificial; Ciencia e Enxeñaría de Datos; Computación de Altas Prestacións; e Servizos e Redes Intelixentes, e unha área de investigación transversal a todas elas: a Ciberseguridade.

O CITIC está acreditado como Centro de Excelencia e membro da Rede CIGUS para o período 2024-2027, o que avala a calidade da súa investigación. A acreditación, estruturación e mellora do CITIC está cofinanciada pola Xunta de Galicia e nun 60% pola Unión Europea no marco do Programa Operativo FEDER Galicia 2021-2027, co obxectivo temático de promover “unha Europa máis intelixente: transformación económica innovadora e intelixente” (ED431G 2023/01).

A Coruña, 25 de maio de 2026

A Universidade da Coruña vén de recibir o Premio Ártabro ao servizo á sociedade nunha gala que tivo lugar o venres, día 22 de maio, no teatro Jofre de Ferrol, organizada por Galicia Ártabra con motivo do décimo quinto aniversario deste diario dixital.

O galardón, concedido ao programa de Aprendizaxe Servizo (ApS) da UDC, foi entregado por parte do reitor Ricardo Cao, a Ana Ares, vicerreitora do Campus de Ferrol e Responsabilidade Social, e recoñece o impacto dunha metodoloxía que integra a formación académica co compromiso social, promovendo a participación activa do estudantado en proxectos orientados a dar resposta a necesidades reais da contorna. E faino xustamente coincidindo co décimo aniversario desta iniciativa, consolidade xa como referente na conexión entre universidade e sociedade.

O desenvolvemento da Aprendizaxe Servizo na UDC foi impulsado desde hai unha década pola Oficina de Cooperación e Voluntariado e polo Centro Universitario de Formación e Innovación Educativa (CUFIE) da UDC, servizos que apostaron pola implantación desta metodoloxía como ferramenta clave para fortalecer a responsabilidade social universitaria e favorecer unha aprendizaxe activa, crítica e comprometida co territorio.

Ao longo destes dez anos, o programa de Aprendizaxe Servizo permitiu desenvolver 260 proxectos en colaboración con entidades sociais, institucións e colectivos, contando coa participación de 8.600 estudantes e 159 entidades. Estas iniciativas contribuíron tanto á formación integral do estudantado como á xeración dun impacto positivo na comunidade.

Este recoñecemento supón un novo impulso ao compromiso da Universidade da Coruña coa responsabilidade social e a innovación na aprendizaxe, reforzando o seu papel como axente activo no desenvolvemento social, cultural e económico.