Os grupos, unidades ou persoas investigadoras recibirán asistencia técnica para a definición de obxectivos de fortalecemento e consolidación e para a elaboración dunha folla de ruta.

Esta última, que será obxecto dun seguimento anual, contemplará accións enfocadas a:

• Abordar cambios na organización e dinamización da actividade.
• Fortalecer as capacidades de investigación e transferencia, a estratexia de financiamento ou a proxección internacional.

Estas medidas poderán referirse aos seguintes aspectos:

• Definición da estrutura organizativa do grupo ou unidade: agregación ou reordenación de capacidades.
• Reforzo do liderado.
• Busca de sinerxías con outros grupos, unidades ou persoas investigadoras.
• Mellora da cohesión e colaboración interna.
• Reorientación do foco estratéxico da investigación.
• Reformulación dos ámbitos sectoriais e sociais de proxección da investigación.
• Mellora da produción científica para un maior impacto.
• Reforzo das actividades de valorización e transferencia.
• Impulso da ciencia aberta.
• Promoción da internacionalización.
• Captación de recursos de fontes públicas e privadas.
• Implantación de sistemas de control e xestión.
• Outras cuestións que se consideren de interese en cada caso en particular.

O programa AGRUPA contempla tamén a concesión de financiamento basal para promover ou consolidar a actividade de investigación e transferencia dos grupos, unidades e persoal investigador a nivel individual. Esta liña de apoio do programa instrumentalízase a través dunha convocatoria de concorrencia competitiva á que é requisito presentarse para os beneficiarios e beneficiarias do servizo de asesoramento.

A maiores, estableceranse outras accións para financiar de xeito específico:

• A elaboración dun plan de acción para acadar obxectivos de mellora.
• O asesoramento a cargo de consultoras externas para abordar accións de mellora.

As persoas coordinadoras dos grupos e unidades e os investigadores e investigadoras que reciban financiamento basal interno deberán elaborar un informe anual para reportar sobre o uso destes recursos e o impacto na súa actividade. A revisión deste informe por parte da Vicerreitoría de Investigación e Transferencia pode supoñer a revisión das condicións do apoio técnico e económico do programa en anos sucesivos.