A Oficina de Captación de Persoal Investigador (OCPI), dependente da Vicerreitoría de Investigación e Transferencia, foi creada en 2023 co obxectivo de apoiar as políticas e os programas relacionados coa captación de talento na UDC.

O compromiso da UDC coa atracción e a retención de talento non é unha tendencia incipiente, senón que xorde da visión da institución para promover o desenvolvemento dunha investigación de alto nivel e é o medio para aumentar a participación e o éxito da nosa universidade en convocatorias de ciencia excelente de ámbito nacional (programas Ramón y Cajal, Beatriz Galindo, ATRAE...) como internacional (axudas ERC, Accións Marie Skłodowska-Curie...). 

Como reflexo desta aposta estratéxica, a UDC traballa desde hai anos en dous programas propios e pioneiros destinados á atracción e a retención do talento investigador, como o programa berce e o programa InTalent.

A atracción e a retención de talento é un motor fundamental para o avance dos indicadores de calidade investigadora, docente e de xestión. Tendo isto en conta, as principais funcións asignadas á OCPI son as seguintes:

• Deseñar e coordinar o plan de atracción de talento da UDC.
• Identificar e potenciar o talento interno, así como captar novo persoal investigador, xa sexa emerxente ou establecido, con demostrada produción científica de calidade, que estea interesado en desenvolver a súa carreira investigadora na UDC.
• Ofrecerlle asesoramento, soporte técnico e apoio ao persoal investigador á hora de elaborar propostas de ciencia excelente, con especial atención ao persoal investigador captado externamente e ao formado na UDC.
• Facilitar a incorporación e adaptación do novo persoal investigador á UDC, para lle asegurar unha transición suave e un inicio produtivo do seu labor investigador.
• Xestionar e executar programas e proxectos propios de atracción de talento.
• Apoiar a preparación de propostas estratéxicas institucionais.
• Outras accións relacionadas coa promoción da excelencia científica.