A Coruña, 16 de novembro de 2023.- A Universidade da Coruña vén de facer pública a proclamación de Ricardo José Cao Abad e Fermín Luis Navarrina Martínez como candidatos provisorios a reitor das vindeiras eleccións, que serán o día 4 de decembro.

De acordo co calendario electoral, as candidaturas serán definitivas, logo do período de reclamacións, o día 22 de novembro. Ao día seguinte, 23 de novembro, abrirase a campaña electoral que se estenderá ata o día 1 de decembro.

As eleccións, o día 4 de decembro, serán telemáticas en horario de 10:00 a 19:00 horas. Poderán votar mediante elección directa e sufraxio universal, os membros da comunidade universitaria -profesorado, alumnado e persoal de administración e servizos-. Están chamados á urna dixital un total de 18.760 votantes.

O voto para a elección de Reitor será ponderado de conformidade coas seguintes porcentaxes:

• Sector A: 51% correspondente ao profesorado doutor con vinculación permanente á Universidade, cun censo de 854 docentes.
• Sector B: 12% correspondente ao resto do persoal docente e investigador, cun censo de 780 persoas.
• Sector C: 28% correspondente ao alumnado, cun censo de 16.333 estudantes.
• Sector D: 9% correspondente ao persoal de administración e servizos, cun censo de 793 persoas.

Máis información en:

https://udc.gal/gl/goberno/equipo_reitoral/secretaria/documentos/eleccions/reitoria2023/