• IberGIS supón un salto adiante na simulación hidrolóxica, ao integrar nunha mesma contorna as capacidades de Iber e QGIS, e ao incorporar computación de alto rendemento para xerar modelos máis realistas en menos tempo

• O novo software preséntase na Coruña diante de máis de sesenta profesionais da administración, da empresa e da universidade, para ensinar as súas aplicacións prácticas na planificación de redes de drenaxe e na redución do risco de inundacións

A Coruña, 24 de setembro de 2025.- O Grupo de Enxeñaría da Auga e do Medio Ambiente (GEAMA) da UDC vén de desenvolver unha nova ferramenta gratuíta de simulación hidrolóxica que combina precisión, realismo e eficiencia ao servizo da análise e xestión das augas en contornas urbanas e rurais: IberGIS.

Esta ferramenta, desenvolta no marco do proxecto DRAIN (Digital RAIN. Un modelo integrado de drenaxe urbana), combina as capacidades do modelo numérico bidimensional Iber na contorna do Sistema de Información Xeográfica QGIS. A integración permite realizar análises hidrolóxicas e hidrodinámicas detalladas de fluxos superficiais a escala de conca, tanto en contornas urbanas como rurais, combinando a potencia do motor de Iber coas capacidades de xeoprocesamento e visualización de QGIS.

Ademais, grazas ao funcionamento acoplado dos motores de cálculo de Iber e de SWMM, IberGIS permite xerar modelos duais de drenaxe urbana, podendo incorporar a rede de saneamento; o que supón a xeración de modelos máis realistas, e favorece á súa vez unha planificación máis efectiva nos deseños das redes de drenaxe, na xestión de augas pluviais, e na redución do risco de inundacións nas contornas urbanas. Así mesmo, a implementación das técnicas de computación de alto rendemento nos seus motores de cálculo permite reducir os tempos de simulación e realizar análises de alta resolución en tempos operativos. A ferramenta distribuirase en forma de plugin de QGIS.

A presentación pública, enmarcada no proxecto DRAIN, estase a celebrar hoxe na Sala Cloud CITIC e na Escola Técnica Superior de Enxeñaría de Camiños, Canai e Portos da Universidade da Coruña, e reúne a máis de 60 profesionais do sector, procedentes de distintas empresas e administracións públicas relacionadas coa xestión da auga, de universidades e de centros de investigación con experiencia en modelización hidráulica. Nesta presentación abordaranse casos reais de aplicación e explicaranse as capacidades actuais da ferramenta, así como as posibilidades de ampliación futura.

Mañá, día 25, o encontro concluirá cunha reunión estratéxica entre os desenvolvedores do modelo Iber (www.iberaula.es), na que se expoñerán novas funcionalidades a desenvolver, posibles colaboracións con entidades interesadas e estratexias para a solicitude de novas axudas e financiación, tanto nacional como internacional.

Os traballos realizáronse no marco do proxecto “DRAIN - Digital RAIN. An Integrated Urban Drainage Model” (CPP2021-008756), financiado por MICIU/AEI/10.13039/501100011033 e pola Unión Europea a través de NextGenerationEU/PRTR.