A Coruña, 5 de xullo de 2022.- Durante este mércores 6, xoves 7 e venres 8 de xullo, máis dun centenar de docentes e investigadores daranse cita na Facultade de Informática da Universidade da Coruña nas XXVIII Xornadas sobre a Ensinanza Universitaria da Informática, JENUI 2022, o único congreso español sobre ensinanza universitaria de Informática.

As xornadas, que serán inauguradas o mércores 6 ás 9:30 horas polo reitor da UDC, Julio Abalde, están promovidas pola Asociación de Ensinantes Universitarios da Informática (AENUI) e organizadas polo Campus Innova e a Facultade de Informática. O comité organizador está constituído por membros do CITIC, liderados por Adriana Dapena Janeiro e José Ramón Paramá Gabía.

JENUI ten como obxectivo promover o contacto, o intercambio e a discusión de coñecementos e experiencias entre profesorado universitario de Informática e grupos de investigación, así como debater sobre o contido dos programas e os métodos pedagóxicos empregados e materializar un foro de debate no que presentar temas e enfoques innovadores orientados a mellorar a docencia da Informática nas universidades.

Obradoiro previo sobre investigación educativa

Na xornada previa, celebrouse no CITIC o taller práctico “De que falamos cando falamos de investigación en educación universitaria da Informática”, a cargo do profesor da Universitat Politècnica de Catalunya David López Álvarez.

O obradoiro centrouse en como deseñar unha investigación en educación, desde o seu esbozo ata a súa publicación, para proporcionar unha metodoloxía nesta área tanto de forma xeral como da Informática en particular.