• O encontro reunirá a preto de cincuenta científicos de diversas nacionalidades, incluíndo 15 expertos en computación do propio CERN. 

• A organización do evento está a cargo dos investigadores Veronika Chobanova, Diego Martínez Santos e Carlos Vázquez Sierra, todos membros da Facultade de Ciencias da UDC. 

• Vincenzo Vagnoni, director do experimento LHCb, impartirá o día 31 de xaneiro ás 12:30 o seminario titulado “From macro to micro: a brief journey through modern particle physics”, que terá lugar no salón de actos da Facultade de Ciencias e será aberto para todos os públicos.

A Coruña, 24 de xaneiro de 2025.- A Universidade da Coruña (UDC) organiza, do 27 ao 31 de xaneiro, un workshop internacional centrado na computación aplicada ao experimento LHCb (Large Hadron Collider beauty) do Centro Europeo de Investigación Nuclear (CERN), con sede en Xenebra (Suíza). Este evento, que terá lugar na cidade da Coruña, reunirá a preto de cincuenta científicos de diversas nacionalidades, incluíndo 15 expertos en computación do propio CERN, e promete ser un punto de encontro para o intercambio de coñecementos e experiencias no ámbito da computación de alto rendemento.

Durante o workshop, os participantes abordarán temas de gran relevancia como a computación de altas prestacións con GPU (Unidade de Procesamento de Gráficos), a simulación de procesos físicos e o uso de intelixencia artificial no tratamento de datos. Estas áreas son fundamentais para o éxito do experimento LHCb, que require unha enorme capacidade de computación para analizar os datos obtidos nas investigacións sobre partículas subatómicas.

A organización do evento está a cargo de Veronika Chobanova, investigadora contratada nos programas Ramón y Cajal e InTalent; Diego Martínez Santos, investigador distinguido do programa Oportunius da Xunta de Galicia e o investigados Ramón  Cajal Carlos Vázquez Sierra, todos membros da Facultade de Ciencias da UDC.

Ao longo dos cinco días do evento, terán lugar conferencias impartidas por persoal destacado da UDC, como Susana Ladra e Verónica Bolón, ambas da Facultade de Informática da Universidade da Coruña e do CITIC, que compartirán a súa experiencia e coñecementos sobre as últimas tendencias en computación aplicada.

Outra das citas destacadas do workshop será a intervención de Vincenzo Vagnoni, director do experimento LHCb, quen ofrecerá o seminario titulado “From macro to micro: a brief journey through modern particle physics” (, o cal terá lugar o día 31 de xaneiro ás 12:30 no Salón de Actos da Facultade de Ciencias. Este seminario estará aberto para todos os públicos, brindando a oportunidade de achegarse ao mundo da física de partículas.

A UDC reafirma así o seu compromiso co avance da ciencia e a investigación, promovendo eventos que favorecen a colaboración internacional e o intercambio de coñecementos entre persoal experto de todo o mundo.