• O encontro, no que se analizarán os desafíos ambientais e sociais máis urxentes, reunirá durante os días 23 e 25 de setembro a persoal investigador do eido internacional.
• O obxectivo é tratar de avanzar en estratexias de mitigación e resiliencia.

A Coruña, 23 de setembro de 2025.- A Universidade da Coruña inaugurou hoxe o IV International Meeting “Strategies for Mitigating Climate and Conflicts Induced Threats and Risks”, que terá lugar desde hoxe e ata o día 25 de setembro no Centro de Innovación Tecnolóxica en Edificación e Enxeñaría Civil da Universidade da Coruña (CITEEC). O acto de apertura contou coa participación do vicerreitor de Investigación e Transferencia da UDC, Jerónimo Puertas Agudo; o director do CITEEC, Fernando Martínez Abella; o director da Escola Técnica Superior de Arquitectura, Miguel A. Abelleira Doldán e a decana da Facultade de Ciencias da Educación, Ana Sánchez Bello.

Esta cita, organizada polo Grupo de Investigación Persoa-Ambiente da UDC e a IAPS Sustainability Network baixo a coordinación dos docentes Ricardo García Mira e Cristina García Fontán, destaca polo seu marcado carácter internacional e interdisciplinario. Relatores de prestixiosas institucións académicas e gobernamentais (Taiwán, Perú, México, Brasil, Italia, Reino Unido, España, entre outros) reuniranse estes días para reflexionar sobre os riscos ambientais e sociais derivados do cambio climático e dos conflitos asociados, abordando estratexias de mitigación desde a investigación, a planificación e a acción comunitaria. A diversidade de perfís, que inclúe catedráticos, persoal investigador postdoutoral e predoutoral, asegura un diálogo rico entre a experiencia consolidada e as novas liñas de investigación.

A urxencia de atender, desde o interior e desde o exterior, os profundos cambios ambientais que nos afectan, sitúa este encontro nun momento clave para a comunidade académica e para a sociedade.

O programa estrutúrase ao redor de varios eixos temáticos clave: os impactos directos do cambio climático e as estratexias de adaptación, con estudos de caso en Perú, Brasil e México; o desenvolvemento de solucións en arquitectura e urbanismo sostible, incluíndo vivendas de emerxencia e o paradigma da Nova Bauhaus Europea; e unha profunda análise das dimensións psicosociais e conductuais da sustentabilidade, explorando desde os hábitos de consumo ata as respostas psicolóxicas ante desastres ambientais. Adicionalmente, dedicarase un espazo significativo á política científica e o financiamento da investigación en Europa.

O carácter multidisciplinar do encontro reflíctese na variedade de perspectivas, que abarcan desde a psicoloxía social e ambiental ata a arquitectura, a socioloxía e a arte contemporánea, consolidando o evento como un foro crucial para a síntese de coñecemento e a colaboración internacional.