O próximo curso ofrecerase por primeira vez a opción dos graos abertos. Ciencias Sociais e Xurídicas, no Campus da Coruña con dez prazas, e o de Enxeñaría Industrial, no  Campus de Ferrol, con oito prazas. Os graos abertos combinan materias de varios graos da mesma rama de coñecemento. O obxectivo desta modalidade é ofrecer aos estudantes que inician o seu percorrido na UDC a posibilidade de non ter que escoller un grao nun primeiro momento, senón que poderán ir cursando materias de diferentes graos dunha mesma rama de coñecemento e, durante o segundo ano, elixir o grao que máis se adecúe ás súas preferencias.

Unha boa parte dos créditos que fagan serán recoñecidos no grao de destino, os que non, constaranlles igualmente no seu expediente académico e no seu Suplemento Europeo ao Título. Sempre contarán co asesoramento e acompañamento dun titor que lles axudará a ir definindo a súa traxectoria académica.