Período: Anual

Duración: 700 horas

Horario de clases: Luns a venres, 9.30 AM-14.30 PM

Este curso de español presencial está deseñado para estudantes asiáticos que desexan comezar a estudar ou aprender español durante a súa estadía no noso país, e correspóndese cos diferentes niveis do Marco común europeo de referencia para as linguas do Consello de Europa. Preténdese potenciar o desenvolvemento significativo das diferentes destrezas lingüísticas (comprensión auditiva e lectora, e expresión oral e escrita), combinadas con contidos léxicos e gramaticais para responder ás necesidades comunicativas e académicas do alumnado.

A docencia efectuarase a través de clases teóricas e prácticas que permitan crear un proceso de ensino-aprendizaxe adaptado ás necesidades reais do alumnado en contexto de inmersión, baseado nun enfoque orientado á acción. En clase propoñeranse actividades e tarefas que permitan observar cuestións lingüísticas, e recoñecer as regras de gramática, e as funcións comunicativas que actúan nelas. Estas actividades combinaranse con tarefas controladas e semicontroladas para que o alumnado interiorice as estruturas e funcións da lingua; ademais doutras actividades (presentacións orais individuais e/ou en grupo, debates, dramatizacións, simulacións e xogos de rol) que sirvan para perfeccionar a pronuncia e fomentar a fluidez en expresión oral.

O traballo dentro e fóra da aula basearase na práctica das distintas destrezas: produtivas (expresión oral e escrita), receptivas (comprensión oral e escrita e interpretación de códigos non verbais), e as que se basean na interacción e a mediación. Ademais, a reflexión sobre a gramática e usos lingüísticos do español, xunto cos aspectos interculturais e socioculturais constituirán unha parte fundamental dos contidos do curso.

Implementaremos no curso dinámicas de saídas culturais e traballos prácticos en grupos, a través das cales pretendemos estimular a interacción con nativos e a fluidez na comunicación oral, ademais de fomentar o apoio no resto do grupo para a aprendizaxe común e fortalecer a autoconfianza na capacidade de expresión. Así mesmo, promoverase a aprendizaxe autónoma de acordo coas necesidades e os obxectivos das distintas actividades.