A Coruña, 3 de xullo de 2019.- O vindeiro día 12 de xullo, ás 19:30 horas a sede da Real Academia de Medicina de Galicia acollerá o acto solemne de ingreso como Académica Numeraria do sillón de Hidroloxía Médica da profesora da Universidade da Coruña Rosa Meijide Faílde.

A profesora impartirá o discurso de recepción “Hidroloxía médica: camiñando cara a evidencia científica”, que será contestado polo Académico Numerario de Radioloxía e vicepresidente da Real Academia, o profesor Jorge Teijeiro Vidal. A continuación, o seu presidente, José Carro Otero, efectuará a salutación á nova Académica.

A profesora Rosa Meijide Faílde é catedrática de Escola Universitaria, do departamento de Fisioterapia, Medicina e Ciencias Biomédicas, da área de Radioloxía e medicina física. Pertence ao grupo de investigación en Terapia Celular e Medicina Rexenerativa. As súas liñas de investigación tratan de dianas terapéuticas para o tratamento da artrose; o sulfuro de hidróxeno e outros produtos como axentes antiinflamatorios e antioxidantes e estudos clínicos en Balneoterapia, Medicina Física e Rehabilitación.