A Coruña, 13 de decembro de 2023.- O reitor da Universidade da Coruña, Julio Abalde, recibirá mañá, xoves, 14 de decembro, na Sala de Prensa da Reitoría, ás 12:00 horas, aos deportistas de alto nivel (DAN) da UDC do curso pasado, xunto coa vicerreitora de Igualdade, Cultura e Deporte, Cristina López Villar, e a directora de Deportes, Marta Bobo, nun acto no que se fará un recoñecemento aos medallistas dos Campionatos de España Universitarios que se desenvolveron ao longo deste ano.

A UDC acolle este curso un total de 91 deportistas dentro do programa DAN UDC de 27 modalidades deportivas diferentes, tales como pádel, tenis de mesa, squash, atletismo, vela, ciclismo, remo olímpico, piragüismo, tríatlon, natación, arbitraxe de fútbol, fútbol, hóckey patíns, judo, taekwondo, karate e deportes asociados, boxeo, muay thai, halterofilia, escalada, montañismo, surf, bodyboard, salvamento e socorrismo, péntatlon moderno, softball e tiro con arco.

Estes deportistas realizan os seus estudos nas facultades de Enfermaría e Podoloxía, Ciencias, Ciencias do Deporte e a Educación Física, Informática, Ciencias da Educación, Fisioterapia, Economía e Empresa, Ciencias da Saúde, Humanidades e Documentación, Dereito, Ciencias da Comunicación e as escolas de Relacións Laborais da Coruña, Arquitectura, Náutica e Máquinas e a Escola Politécnica de Enxeñaría de Ferrol.