A startup galega PhotoILike, especializada na análise do atractivo visual de imaxes inmobiliarias mediante intelixencia artificial, incorpórase ao ecosistema de Keldai, compañía tecnolóxica centrada en solucións personalizadas de IA. A operación, a través da adquisición dunha participación maioritaria, reforza a posición de ambas empresas no mercado e marca un paso decisivo para a expansión de PhotoILike máis alá do sector inmobiliario.

PhotoILike é unha spin-off nacida na Universidade da Coruña, co apoio da súa Oficina de Transferencia de Coñecemento (OTC), que conta con Juan Romero, recoñecido como o mellor investigador europeo en intelixencia artificial en 2021. A empresa logrou posicionarse como referente no uso de algoritmos para mellorar o rendemento dos anuncios inmobiliarios. A súa tecnoloxía procesou millóns de imaxes en España nalgúns dos portais inmobiliarios máis coñecidos, conseguindo aumentar de maneira demostrable os clics, os leads e os contactos comerciais fronte aos anuncios editados manualmente.

Esta innovación foi recentemente recoñecida cun galardón na II Edición dos Premios Solvia PropTECH, que destaca ás empresas máis innovadoras do sector inmobiliario.

Jacobo Pruschy, CEO de Keldai, sinala que “esta integración permítenos sumar o talento técnico e creativo de PhotoILike, unha empresa que representa a excelencia universitaria galega e o potencial transformador da IA. Xuntos podemos ofrecer solucións intelixentes a múltiples sectores, cunha base sólida en datos e imaxes”.

Pola súa banda, Manuel Pérez García, CEO de PhotoILike, declara que “este avance con Keldai consolida o traballo que levamos desenvolvendo nos últimos anos e impúlsanos a escalar a nosa tecnoloxía a novos mercados e sectores máis alá do inmobiliario, xa que ese é o potencial de todas as ferramentas que temos desenvolvidas e en funcionamento”.

Con esta incorporación, Keldai afianza a súa estratexia de crecemento como empresa emerxente con vocación de liderado nacional en IA, ampliando o seu portafolio con solucións que impulsan a eficiencia dixital en múltiples industrias.

Fundada en 2024, Keldai é unha empresa desenvolvedora especializada en intelixencia artificial que ofrece solucións personalizadas para diversos sectores, garantindo resultados rápidos e seguros que aumentan a eficiencia e a fiabilidade. Destaca polo valor do seu equipo humano.

PhotoILike, nacida en 2021 como spin-off da Universidade da Coruña e financiada a través da convocatoria IGNICIA Proba de Concepto (Xunta de Galicia), consolidouse como un referente na análise da estética visual mediante IA. O seu sistema AutoAd, unha das ferramentas máis utilizadas polas empresas, organiza automaticamente as imaxes dos anuncios inmobiliarios para maximizar o seu impacto visual, mentres que a ferramenta PhotoImprove mellora a calidade das imaxes con filtros intelixentes. As súas solucións demostraron aumentar en máis dun 20% as visitas aos anuncios de inmobles nos portais inmobiliarios en contactos reais e, polo tanto, aumentar as conversións en vendas.