• Persoal investigador dos grupos BIOENGIN e GEAMA organizan esta cita internacional de carácter bianual, que pretende reunir na cidade herculina arredor de 400 persoas de todo o mundo. 

• A cita anterior tivo lugar en Xapón no ano 2024, xa que as sedes alternan entre cidades europeas e doutros continentes. 

• O Congreso xa ten aberto o prazo para o envío de “abstracts” e tamén para realizar a inscrición.

A Coruña, 19 de xullo de 2025.- Os catedráticos de Enxeñaría Química da UDC e investigadores do Grupo BIOENGIN (Bioenxeñaría Ambiental e Control de Calidade), Mari Carmen Veiga e Christian Kennes; e o profesor Juan Joaquín Suárez López, investigador do grupo GEAMA (Enxeñaría da Auga e do Medio Ambiente); son os encargados da organización da 11^th International Conference on Engineering for Waste and Biomass Valorisation (11ª Conferencia Internacional de Enxeñaría para a Valorización de Residuos e Biomasa), que terá lugar entre o 7 e o 10 de xullo do ano 2026 na Universidade da Coruña.

Esta prestixiosa cita bianual de carácter internacional, reúne en cada edición ao redor de 400 investigadores e investigadoras de todo o mundo co obxectivo de afondar no tratamento, aproveitamento e valorización de contaminantes e recursos renovables, como os residuos, a biomasa ou os gases de efecto invernadoiro.

Estará organizado en función de diversos bloques temáticos, que van desde a xestión de recursos e materias primas, a circularidade dos residuos da minería urbana, a cadea de valor do biocarbón, o manexo dos residuos plásticos e químicos, ou o almacenamento de enerxía, entre outros.

Contará cun cartel de relatores de recoñecido prestixio, algún deles xa confirmados como Solange I. Mussatto, da Technical University of Denmark (Dinamarca); Clara Santato, da Polytechnique Montreal (Canadá); Johannes Lehmann, da Cornell University (Estados Unidos), ou Donald L. Smith, da McGill University (Canadá).

O evento, cuxas anteriores sedes tiveron lugar en Sendai (Xapón) no ano 2024, e Conpenhague (Dinamarca) en 2022, ten xa aberto o prazo de envío de “Abstracs” ata o vindeiro mes de outubro, así como a inscrición para os diferentes colectivos. Está enmarcado dentro da serie de conferencias WasteEng Conference Series, e contra, entre as entidades organizadoras, ademais da Universidade da Coruña a escola de enxeñeiros francesa IMT Mines Albi, a editorial académica alemana Springer Nature, o Centre National de la Recherche Scientifique (CNRS) que é a institución de investigación científica máis importante de Francia, as universidades de Princeton e Columbia (Estados Unidos).

Para máis información sobre o congreso, pódese consultar a páxina web: https://wasteeng2026.org/.