A Coruña, 19 de setembro de 2025.- O martes 23 de setembro, ás 17:00 horas, terá lugar no Cine Teatro Alfonsetti a inauguración da nova edición do Programa de Democratización do Coñecemento, impulsado pola Universidade Sénior da Universidade da Coruña e dirixido a persoas maiores de 50 anos de Betanzos. Nesta edición, un cento de participantes formarán parte desta iniciativa educativa.

A Universidade Sénior, o programa universitario para maiores de 50 anos da Universidade da Coruña, pon en marcha neste 2025 a 7ª edición deste Programa de Formación Universitaria Específico para Adultos Maiores, grazas ao financiamento da Xunta de Galicia e coa colaboración do Concello de Betanzos. O programa desenvolverase entre os meses de setembro e outubro no Cine Teatro Alfonsetti de Betanzos. Nesta edición, participarán 100 persoas seleccionadas polo Concello de Betanzos de entre as 150 solicitudes presentadas.

O acto de inauguración contará coa presenza da alcaldesa de Betanzos, María Barral Varela; a directora da Universidade Sénior, Matilde García Sánchez, e do concelleiro delegado de Persoal; Educación, Medio Ambiente, Parques e Xardíns e Obras Públicas e Servizos, Andrés Teijo Hermida.

O programa consta de tres módulos temáticos, con sesións teóricas impartidas por profesorado da Universidade da Coruña, dúas veces por semana. Os módulos abordarán diversas áreas de coñecemento:

MÓDULO I: HUMANIDADES E CIENCIAS SOCIAIS

• 23 de setembro: “A Dirección Artística no Cine”, Profa. Victoria de León Sanjuán
• 24 de setembro: “Literaturas do Mundo: unha viaxe á orixe dos libros”, Profa. Elena Martín Cancela
• 30 de setembro: “A xestión do común: Unha visión desde a economía e os comics”, Prof. Manuel Gómez Suárez

MÓDULO II: CIENCIAS DA TERRA E TECNOLOXÍA

• 7 de outubro: “(Bio)invasións en Galicia: mecanismo, impacto e xestion”, Prof. Sergio Rodríguez Roiloa
• 8 de outubro: “ADN Antigo e Evolución Humana: unha viaxe ao pasado a través dos nosos xenes”, Profa. Gloria Mª González Fortes
• 14 de outubro: “Descubrindo a Intelixencia Artificial: retos, aplicacións e ferramentas”, Prof. Álvaro Michelena Grandío

MÓDULO III: CIENCIAS DA VIDA E DA SAÚDE

• 21 de outubro: “A saúde que nace da participación”, Profa. Silvia Veiga Seijo
• 22 de outubro: “O Cambio Climático: causas e consecuencias”, Prof. Salvador Fojón Polanco
• 28 de outubro: “Boas Prácticas para o Coidado do Benestar Psicolóxico”, Prof. Carlos Freire Rodríguez

O Programa formativo rematará cunha xornada de visitas académicas e culturais na Coruña, o día 29 de outubro de 2025.

Desde a súa posta en marcha en 2018, a Universidade Sénior mantén o compromiso de ofrecer formación de calidade ás persoas maiores de 50 anos, dando resposta ás súas inquedanzas e necesidades formativas.