Comeza o prazo de preinscrición en 1º curso da Universidade Sénior

O 25 de xuño comezou o período de solicitude para cubrir as 160 prazas de primeiro curso

A Universidade Sénior, como programa de estudios universitarios para maiores, consta dun plano docente distribuído en catro cursos académicos cunha duración de 8 meses (outubro-xuño) e cun total de 36 créditos (360 horas lectivas), a razón de 9 créditos cada ano, tralo que se obtén o Título de Graduado Senior pola Universidade da Coruña.

Os requisitos que deben cumprir os alumnos e alumnas son: ser maior de 50 anos e atoparse nalgunha das seguintes situacións: xubilado/a, prexubilado/a, parado/a ou persoa sen actividade laboral remunerada.

Dada a elevada demanda de prazas, entre o 25 de xuño e o 31 de xullo, e entre o 2 e o 6 de setembro terá lugar a preinscrición, para o día 9 de setembro ter lugar un sorteo público e a continuación, entre os días 14 e 21 de setembro proceder á matrícula daqueles alumnos e alumnas que obtiveran praza.

A matrícula dos alumnos e alumnas que continúan os seus estudos na Universidade Sénior (no segundo, terceiro e carto curso) terá como prazo os días entre o 25 de xuño e o 5 de xullo.

Os que non acaden praza en primeiro curso así como o resto do alumnado da Universidade Sénior poderase matricular como oínte nalgunha das asignaturas do plano de estudos, nun prazo que vai do 30 de setembro ao 4 de outubro.

Tanto a preinscrición como as matrículas poderán realizarse nas Secretarías da Universidade Sénior de ámbolosdous Campus. En Ferrol, no Edificio de Usos Administrativos de Esteiro, e na Coruña, na Normal (antiga escola de maxisterio), no Paseo de Ronda, 47, 1º.