galegonormativa
catálogo
libraría Dixital
novidades
libros en preparación
revistas
peticións
avaliación
formularios
ligazóns
suxestións
O Servizo de Publicacións, adscrito á Vicerreitoría de Comunicación, é o organismo editorial propio da Universidade da Coruña e, como tal, aspira a cumprir de xeito eficaz tres fins principais, que son a difusión da investigación xerada pola institución entre a comunidade científica, o apoio ao labor docente do profesorado e discente do estudantado, e a transmisión do coñecemento e da cultura na sociedade en xeral. Para levar adiante estes cometidos, o Servizo ocúpase tanto das tarefas de produción editorial como da promoción e da comercialización de libros e revistas, así como da xestión dos intercambios con outras universidades e institucións.
O Servizo de Publicacións conta cun regulamento propio, aprobado en Consello de Goberno do 31 de maio de 2005, que contén as directrices fundamentais da súa política editorial. Os principais valores que presiden as actividades do Servizo de Publicacións son a procura da calidade nos diferentes niveis e etapas do proceso editorial e a participación da comunidade universitaria na presentación de iniciativas e na propia avaliación do seu funcionamento ordinario. A Comisión de Publicacións, delegada do Consello de Goberno da Universidade, é a principal canle de participación de toda a comunidade universitaria na planificación e na xestión editorial.
Desde a súa creación, o Servizo de Publicacións vén mantendo alianzas coas restantes editoriais universitarias do Estado, que se concretan principalmente na xestión do intercambio de fondos. Desde 2003 está integrado na Unión de editoriales universitarias españolas (UNE), coa que participa en feiras do libro españolas e internacionais, e publica periodicamente catálogos colectivos de novidades. Desde 2008 é socio de Cedro.
Esta páxina web intenta ser ante todo un instrumento áxil e eficaz de información e de comunicación cos potenciais usuarios do Servizo, xa sexan membros da comunidade universitaria ou calquera persoa interesada pola cultura e o saber. Convidamos, pois, a todas as persoas que se internen nos seus contidos a enviarnos as súas suxestións para mellorar este ou calquera outro aspecto do Servizo.
A Coruña, outubro de 2005