Esquemas de Financiamento

As actividades apoiadas polo 7ºPM pódense desenvolver segundo diversos esquemas de financiamento (Funding Schemes):

a) Proxectos en colaboración (Collaborative Projects - CP): fináncianse parcialmente proxectos de investigación realizados por consorcios con participantes de diferentes países, destinados a desenvolver novos coñecementos, novas tecnoloxías, produtos, actividades de demostración ou recursos comúns de investigación.

b) Redes de Excelencia (Networks of Excellence - NoE): fináncianse parcialmente iniciativas mediante as que varios organismos de investigación, mesmo empresas, executan un Programa conxunto de actividades, integrando de xeito duradeiro as súas actividades nun campo determinado e a cargo de equipos de investigación que traballan mediante formas de cooperación a longo prazo.

c) Accións de coordinación e apoio (Coordination and Support Actions - CSA): fináncianse ao 100% actuacións de coordinación ou apoio de actividades e políticas de investigación (redes, intercambios, acceso transnacional a infraestruturas de investigación, estudos, congresos etc).

d) Proxectos de investigación nas fronteiras do coñecemento (Frontier Research Actions): fináncianse ao 100% proxectos realizados por investigadores ou equipos de investigación que compiten ao máis alto nivel europeo nun campo de libre elección.

e) Accións de formación e desenvolvemento das carreiras dos investigadores (Marie Curie Actions): fináncianse ao 100% accións dirixidas a investigadores en todas as etapas das súas carreiras, nos sectores públicos e privados, desde a formación inicial dos investigadores máis novos á formación permanente, así como a formación profesional.

f) Proxectos de investigación en beneficio das PEME (Research for the Benefit of Sme) - fináncianse parcialmente proxectos de investigación e desenvolvemento tecnolóxico onde o groso da investigación corre a cargo de universidades, centros de investigación ou outras entidades xurídicas, sempre en beneficio de grupos específicos, en particular PEME ou asociacións de PEME.