Catedrático de Universidade de Estatística e Investigación de Operacións na Universidade da Coruña desde 1999.

Licenciado en Matemáticas pola Universidade de Santiago de Compostela en 1988 (con premio extraordinario e primeiro premio nacional) e doutor pola mesma universidade en 1990 (con premio extraordinario).

A súa investigación abrangue a inferencia non paramétrica, os métodos de remostraxe, a análise de supervivencia, a verosimilitude empírica, o risco de crédito e os métodos estatísticos en xenómica e neurociencia. É autor de sete libros e máis de setenta artigos en revistas internacionais. Dirixiu sete teses de doutoramento e foi investigador principal dunha ducia de proxectos de investigación competitivos, e de nove contratos de investigación con empresas, tendo participado como membro noutros quince proxectos e contratos.

Membro da Bernoulli Society e da Sociedad Española de Biometría. Foi membro do Consello Académico da Sociedad Española de Estadística e Investigación Operativa (SEIO). Editor de distintas revistas do JCR, é Presidente de European Courses in Advanced Statistics (ECAS) e membro electo do International Statistical Institute (ISI). Coordinador de Matemáticas na Agencia Nacional de Evaluación y Prospectiva (ANEP) do Ministerio de Ciencia e Innovación (2008-2011).

Entre 2005 e 2008 foi director do Departamento de Matemáticas e membro do Consello de Goberno. Desde abril de 2011 é novamente membro do Consello de Goberno, en representación do Claustro.