Orientación laboral

Do interese da Facultade de Filoloxía da Universidade da Coruña pola inserción laboral e profesional dos seus estudantes egresados dá conta tanto a existencia de prácticas profesionais nas súas titulacións (quer nas antigas licenciaturas quer nos actuais graos e no Mestrado en Lingua e Usos Profesionais) como a organización de Xornadas de Orientación Laboral dirixidas ao alumnado do centro, nomeadamente ao de último ano, para o informar das varias posibilidades de empregabilidade en relación coa formación fornecida na Facultade.

Estas Xornadas de Orientación Laboral son organizadas na Facultade de Filoloxía cada curso académico (normalmente durante o segundo cuadrimestre) desde o ano 2005, e nelas participan tanto persoal da UdC como profesionais en activo nos varios ámbitos laborais relacionados coa formación ministrada no centro. Se quere consultar as xornadas desenvolvidas até o momento, prema aquí.

Alén disto, pode consultar aquí unha listaxe de ligazóns electrónicas de interese para a súa orientación laboral no terreo da investigación, da formación e do emprego.