investigación

Pertenzo ao Grupo de Neurociencia e Control Motor da Universidade da Coruña, Neurocom

Colaboro co laboratorio do Dr. Sur do MIT (Massachusetts Institute of Technology, EEUU).

Fago investigación básica sobre aspectos moi concretos do funcionamento dunha estructura marabillosa: o sistema nervioso.

Sistema nervioso: formado por miles de millóns de neuronas conectadas entre si . Estas células utilizan para comunicarse impulsos eléctricos. Cada unha delas está recibindo e enviando constantemente centos, miles de sinais. A complexidade do sistema é abraiante e é xusto esta complexidade, esta intensa actividade, a que provoca a emerxencia da consciencia. Por iso temos unha percepción de nós mesmos e experimentamos multitude de emocións, feitos que propiciaron e permitiron a sociedade que somos agora, cunha marabillosa capacidade para a creación e a transmisión de información.

Utilizo diversas técnicas de investigación, entre as que destacan a electrofisioloxía: disciplina e conxunto de técnicas que permiten estudiar a actividade eléctrica das neuronas.

As miñas investigacións están enfocadas a varios temas:

1. Circuitería e computación no núcleo cuneatus: este núcleo (grupo de células situadas no tronco encefálico) recibe información sensorial táctil e propioceptiva (posición do corpo nas tres dimensións espaciais), procésaa e envíaa en dirección ao tálamo. Gran parte da computación que se produce no cuneatus está controlada por sinais procedentes da codia cerebral.

1. Mecanismos do sono: podemos estar en dous estados mentais básicos: a) espertos, no que que temos consciencia e b) durmidos. Todo, por suposto, depende da actividade neuronal. A electrofisioloxía, combinada con farmacoloxía (manipulación das sustancias químicas que hai no sistema nervioso), permiten coñecer os mecanismos que subxacen á transición esperto-durmido.

2. O circuíto tálamo-córtico-talámico: a codia cerebral (tamén chamada cerebro) e o tálamo (conxunto de núcleos situados aproximadamente no centro do encéfalo) son dúas rexións que están fortemente interconectadas. A información que corre entre estas dúas áreas determina a nosa percepción sensorial e tamén o estado mental global (esperto-durmido), por iso, para poder comprender a maneira en que procesamos os impulsos sensoriais, é moi importante coñecer a actividade e mecanismos de computación destas neuronas.

3. Computación na codia visual: a visión é un sentido moi espectacular, e un gran reto para os científicos tratar de coñecer cómo elabora o sistema nervioso o mundo visual. Mediante a combinación de técnicas electrofisiolóxicas con técnicas de xeración de imaxes da actividade neuronal, pódense estudiar os mecanismos de construcción da visión.