Web CUFIE

A nosa universidade nunca foi allea ó espazo europeo e internacional en que se move, como tampouco o foi ás necesidades dos docentes. Durante anos veuse proporcionando ó profesorado unha oferta crecente de recursos formativos dirixidos á súa actualización docente e a proporcionarlles coñecementos e ferramentas pedagóxicas coas que realizar máis eficazmente o seu labor (a creación do Centro Universitario de Formación e Innovación Educativa obedece tamén a esta necesidade).

Estas iniciativas e as accións asociadas a elas representan o punto de partida para este plano que agora inicia o seu camiño. Nel pretendemos aumentar a oferta formativa no ámbito da metodoloxía didáctica, o uso das TIC no ensino universitario e as implicacións pedagóxicas do EEES.

O protagonismo dos que ensinan e dos que aprenden é evidente e os cambios que se propoñan para as titulacións, así como os que se derivan da implantación dos créditos ECTS, aféctanlles de xeito directo.

Vivimos nun momento histórico que nos proporciona unha oportunidade para pasar do debate á práctica. A necesidade, asumida politicamente, de homoxeneizar a estrutura universitaria europea para facilitar, mediante a transparencia, a mobilidade da comunidade universitaria xera o contexto de cambio propicio para levar ás aulas algúns principios pedagóxicos que desde a universidade sempre mantivemos. Incluírmos o traballo que o alumno debe realizar e computalo dentro dos programas, darmos un sentido diferente ás titorías para personalizar e individualizar, na medida do posible, a formación que proporcionamos, abrírmonos ás posibilidades que ofrecen as novas tecnoloxías para o ensino e a aprendizaxe, coordinarmos os programas das materias e pensármolos en termos das competencias que queremos desenvolver e do papel que a materia pode ter na formación e inserción laboral dos nosos estudantes, poden ser algúns exemplos disto. A clave de todo o proceso é entender que ensinar e aprender son procesos sempre optimizables e que iso obriga a pensar e repensar o que facemos, e que para que esta reflexión teña sentido é necesario que se realice de forma conxunta. Compartir, é a idea, colaborar é o medio. A coordinación e o coñecemento que así se obteñen non poden ser substituídos por ningunha outra actividade e permiten que aprender uns dos outros sexa tamén unha realidade no ámbito docente.

Esperamos que esta oferta inicial, que será completada con outras dirixidas ós estudantes e ó PAS e que para a seguinte convocatoria estará incardinada dentro do Plano Director Docente da Universidade que comezará a elaborarse en Maio de 2004, sexa útil para o profesorado e que cumpra a función para a que foi deseñada.