Convenio con Sanidade para a colaboración dos institutos de investigación

A Coruña, 19 de xullo de 2013.- Os reitores das tres universidades galegas asinaron esta mañá en Santiago un convenio de colaboración coa conselleira de Sanidade para a colaboración entre os institutos galegos de investigación sanitaria. Os reitores Juan Casares, da Universidade de Santiago de Compostela, Xosé Luís Armesto, da Universidade da Coruña, e Salustiano Mato, da Universidade de Vigo, asinaron o acordo coa conselleira de Sanidade, Rocío Mosquera, nun acto no que estiveron presentes José Castillo, director do instituto de investigación sanitaria de Santiago, IDIS; Francisco Blanco, do da Coruña, INIBIC, e Carmen Navarro, do de Vigo, IBIV.
O acordo ten como finalidade a colaboración conxunta en programas para o fomento de actividades de interese común en investigación, docencia, desenvolvemento e innovación entre os institutos de investigación sanitaria de Galicia, concretándose en proxectos que se asinarán como convenios específicos.
Segundo informa a Consellería de Sanidade, os institutos de investigación sanitaria son claves e estratéxicos para o futuro da investigación e a innovación no sistema sanitario, pois potencian preferentemente a investigación translacional e a incorporación do coñecemento á práctica asistencial. Os institutos, como estruturas de coordinación, xestión, transferencia e avaliación das actividades de I+D+i, e, nun ámbito máis amplo, das actividades de xestión do coñecemento en biomedicina e ciencias da saúde, teñen como misión impulsar a investigación biomédica e a innovación no ámbito da saúde, aproveitando as oportunidades de alto nivel técnico das estruturas sanitarias asistenciais públicas. Ademais, facilitan a capacidade para a captación de recursos económicos e a súa xestión transparente ante a cidadanía. Con este acordo, preténdese facilitar as liñas de colaboración e participación entre os profesionais de diferentes departamentos universitarios e dos centros sanitarios vinculados cos institutos, así como difundir, nos seus respectivos ámbitos, os resultados dos proxectos e actividades que se realicen.