O profesor Salvador Naya toma o relevo na dirección da Cátedra Jorge Juan

A Coruña, 17 de xullo de 2013.- O Centro Cultural e Social de Herrerías, en Ferrol, acollerá mañá o acto de relevo na dirección da Cátedra Jorge Juan do Ministerio de Defensa e a Universidade da Coruña, que actualmente ostenta o capitán de navío Federico Supervielle Pérez, Comandante-Director da Escola de Especialidades “Antonio de Escaño”.
O reitor, Xosé Luís Armesto, e o almirante Xefe do Arsenal de Ferrol, Manuel Garat, así como a vicerreitora do Campus de Ferrol e Responsabilidade Social, Araceli Torres, asistirán mañá a que será a última conferencia da Cátedra deste curso e ao relevo de directores.
A conferencia, prevista para as 20:30 horas, correrá a cargo do capitán de navío José María Blanco Núñez que disertará sobre “Jorge Juan e as novas secretas de América sobre a administración virreinal”. A continuación, o director saínte fará un balance deste curso que finaliza e procederase ao acto formal de toma de posesión de Salvador Naya como director da Cátedra para o vindeiro curso, concluíndo cun discurso do reitor e do almirante Xefe do Arsenal de Ferrol.