Conferencia en Ciencias sobre a evolución xenómica dos xitanos europeos

A Coruña, 26 de abril de 2013.- O Salón de Actos da Facultade de Ciencias, no Campus da Zapateira, acollerá o martes, 30 de abril, ás 13:00 horas, a conferencia do doutor David Comas Martínez, profesor titular da Universitat Pompeu Fabra de Barcelona. O relatorio leva por título A visión xenómica das orixes, dispersión e mestura dos xitanos europeos.
A pesar dos grandes esforzos realizados para afondar na historia das poboacións europeas a través de marcadores xenéticos, aínda existen algunhas minorías europeas que non foron estudadas en profundidade. Este é o caso dos xitanos, a minoría étnica máis grande de Europa, constituída por aproximadamente 11 millóns de persoas. Os xitanos carecen de rexistros históricos escritos sobre as súas orixes e a súa dispersión, aínda que os datos lingüísticos e antropolóxicos teñen apuntado á súa orixe no sur de Asia.
O doutor dará conta no seu relatorio da análise dos datos de todo o xenoma de varios grupos xitanos europeos que confirman a súa orixe india, de acordo cos datos obtidos de liñaxes uniparentais e estudos lingüísticos, que sitúan esta etnia no norte deste territorio hai 1.500 anos. Tras establecerse posteriormente na rexión dos Balcáns, esta minoría comezou a estenderse por Europa hai uns 900 anos, modelando nese proceso a arquitectura xenética dos grupos xitanos actuais.
David Comas é doutor en Bioloxía pola Universidade de Barcelona, onde recibiu o premio do Claustro de Doutores á mellor tese de doutoramento defendida durante o seu curso académico. Na súa traxectoria investigadora realizou estancias en Londres, Múnich ou Helsinki co fin de afondar na análise da diversidade do xenoma en poboacións humanas e as súas implicacións biomédicas e evolutivas. Actualmente é profesor e investigador na Universidade Pompeu Fabra de Barcelona e o Instituto de Bioloxía Evolutiva (CSIC-UPF). A súa liña investigadora céntrase no estudo das causas que forxaron a diversidade xenética humana, desde factores demográficos ata procesos xenómicos, e poder establecer cales son as consecuencias biomédicas desta diversidade. Recibiu a mención do programa ICREA Academia 2011 e publicou un centenar de artigos en revistas especializadas a nivel internacional, así como diversos artigos e capítulos de divulgación sobre a diversidade xenómica humana.