Obradoiros gratuítos no SOEP

O Servizo de Orientación Educativa e Psicolóxica organiza obradoiros para mellorar o rendemento académico dos alumnos

A Coruña, 22 de febreiro de 2012.- O Servizo de Orientación Educativa e Psicolóxica da UDC (SOEP) organiza, dentro do seu programa de obradoiros gratuítos, unhas sesións de formación sobre “Resolución de Conflitos” e sobre “Habilidades comunicativas: técnicas escritas”, que se celebrarán nos meses de marzo e de abril. O obradoiro sobre “Resolución de Conflitos” celebrarase os días 20, 21 e 22 de marzo de 10.00 a 13.30 horas na quenda de mañá e de 16.00 a 19.30 horas na quenda de tarde e o mesmo horario terá o curso de “Habilidades comunicativas”, os días 17,18 e 19 de abril. O prazo de inscrición para ambos obradoiros permanecerá aberto ata o día 15 de marzo. Os interesados poderán dirixirse á web: http://www.udc.es/sape/soep/index.html e ao teléfono 981 337 400 ext. 3621, 3674.
O SOEP é un servizo gratuíto e confidencial destinado ao alumnado da UDC no que traballa un equipo de profesionais que ten como finalidade prestar asesoramento e apoio psicolóxico e psicopedagóxico naquelas cuestións que poden influír negativamente no rendemento académico e no benestar persoal do alumnado. Os obradoiros que organiza este servizo perseguen a adquisición e mellora de habilidades e actitudes necesarias para afrontar o estudo con éxito.